МАШВАРАТИ КОРИИ РАИСИ ШАҲР ДОИР ГАРДИД

Санаи 12.09.2026 дар толори хурди мақомоти иҷроияи ҳокимияти давлатии шаҳр машварати кории Раиси шаҳр доир гардид.

Дар машварати корӣ муовини якум ва муовини Раиси шаҳр, роҳбари дастгоҳ, мудирони шуъбаву бахшҳо ва сохторҳои шаҳр иштирок доштанд.

Машваратро Раиси шаҳр Илҳом Пӯлотзода оғоз намуда, масъалаҳои тақвияти корҳои ободониву созандагӣ, омодагии ҳамаҷониба ба сафарбарнамоии наваскарон ба сафи Қувваҳои Мусаллаҳи кишвар, иҷрои нақшаи "Обуна - 2026" ба рӯзномаву маҷаллаҳои ҷумҳуриявӣ, вилоятӣ ва шаҳриро мавриди баррасӣ қарор дод.

БАРРАСИИ МУРОҶИАТИ ШАҲРВАНДОН

12-уми сентябри соли 2026 дар мақомоти иҷроияи ҳокимияти давлатии шаҳр қабули навбатии шаҳрвандон аз ҷониби Раиси шаҳр Илҳом Пӯлотзода баргузор гардид.

Зимни қабул шаҳрвандон бо масъалаҳои гуногуни иҷтимоӣ ба шаҳрдор муроҷиат намуданд. Аз ҷумла, сокинон вобаста ба ҷудо намудани қитъаи замин, ба расмият даровардани ҳуҷҷатҳои ҳуқуқи истифодаи замин ва манзили истиқоматӣ, ҳалли баҳсҳои марбут ба моликияти шахсӣ ва амсоли инҳо суолҳо дода шуд.

Раиси шаҳр ҳар як муроҷиатро мавриди омӯзиш қарор дода, ба нафарони масъул ҷиҳати баррасии ҳамаҷониба ва андешидани чораҳои мушаххас супоришҳо дод. Таъкид гардид, ки ҳалли саривақтии масъалаҳои шаҳрвандон ва расонидани кумаки амалӣ ба онҳо яке аз самтҳои афзалиятноки фаъолияти мақомоти маҳаллӣ ба шумор меравад.

ТАҚВИЯТИ КОРҲОИ ОБОДОНӢ ДАР ШАҲРАКИ АДРАСМОН

Дар Ҷамоати шаҳраки Адрасмони шаҳри Гулистон дар доираи эълон гардидани соли 2026 "Соли вусъат додани корҳои ободониву созандагӣ ва тақвияту таҳкими худшиносиву худогоҳии миллӣ" корҳои ободонӣ бо маром ҷараён гирифта истодаанд.

Ба ин муносибат дар шаҳрак барқарорсозии кӯдакистони "Садбарг" барои ба тарбия фаро гирифтани наздик ба 200 нафар кӯдак ва мумфаршнамоии роҳҳои дохили маҳал корҳо идома ёфта истодаанд.

Инчунин, корҳои барқарорсозии Комбинати маъдантозакунии Адрасмон низ бомаром ҷараён дорад.

Табрикоти Раиси шаҳри Гулистон Илҳом Пӯлотзода ба ифтихори Ҷашни 35-солагии Истиқлоли давлатии Ҷумҳурии Тоҷикистон

Ҳамшаҳриёни гиромӣ!

Фарорасии санаи фархундаи 35-умин солгарди Истиқлоли давлатии Ҷумҳурии Тоҷикистонро самимона муборак бод гуфта, бароятон тандурустӣ, рӯзгори хушу осуда, иқболи баланд, дар кору пайкоратон муваффақият ва ба Тоҷикистони азизамон осмони мусаффо ва сулҳу амонии ҷовидонаро таманно менамоям.

Бо шарофати Истиқлоли давлатӣ ва бо сарварии хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки нерумандтарин муҳофизи истиқлоли кишвар мебошанд, мардуми Тоҷикистон озодона, дар фазои сулҳу ваҳдат бо сари баланд зиндагӣ ва меҳнат мекунанд.