НАВРӮЗ ҶАШНИ МИЛЛӢ ВА МЕРОСИ ТАЪРИХИИ ТОҶИКОН - ТАНТАНАҲОИ ҶАШНИ НАВРӮЗ ДАР ШАҲРИ ГУЛИСТОН

21 марти соли 2026 дар шаҳри Гулистон Ҷашни Наврӯзи байналмилалӣ бо шукуҳу шаҳомати хоса таҷлил карда шуд. Дар тантанаҳои наврӯзӣ дар шаҳр намояндаи Ҳукумати Ҷумҳурии Тоҷикистон, муовини роҳбари гурӯҳи корӣ бахшида ба 35-солагии Истиқлоли давлатӣ, сардори Раёсати Агентии таъминоти амволи махсуси назди Ҳукумати Ҷумҳурии Тоҷикистон дар вилояти Суғд Убайдзода Иззатулло, муовини Раиси вилояти Суғд Зайнура Азимӣ, муовини Раиси Ҳизби Халқии Демократии Тоҷикистон Мирзоқосим Каримзода, Раиси шаҳри Гулистон Илҳом Пӯлотзода ва роҳбарони мақомотҳои ҳифзи ҳуқуқ ва дигар сохторҳо иштирок доштанд. Ҳамчунин, меҳмонон ва оммаи васеи сокинони шаҳр ба тамошои тантанаҳои идонаи наврӯзи шаҳрӣ омада буданд.

Меҳмононро санъаткорони бахши фарҳанги шаҳр бо навои карнаю сурнай дар ҷашнгоҳ пешвоз гирифтанд. Хонандагони муассисаҳои таълимӣ бо қироати шеърҳо дар васфи Наврӯз меҳмононро ба ҷашнгоҳ хайрамақдам гуфтанд.

Аёдати собиқадорони меҳнат ба муносибати ҷашни байналмилалии Наврӯз

21 марти соли 2026 Раиси шаҳри Гулистон Илҳом Пӯлотзода, муовини Раиси вилояти Суғд Зайнура Азимӣ ва муовини Раиси Ҳизби Халқии Демократии Тоҷикистон Мирзоқосим Каримзода собиқадорони меҳнат - Ҳайдар Муродӣ собиқадори соҳаи молия, ки солҳои сол дар ин соҳа пуршарафона меҳнат намудааст ва Ғайбулло Зайниддинов, ки собиқадори соҳаи саноати сабук-қолинбофӣ буда, солҳои зиёд дар ҶДММ "Қолинҳои Қайроққум" фаъолияти пурсамар намуда, дар рушди ин соҳа саҳми арзишманд гузоштаастро аёдат намуда, ҷашни байналмилалии Наврӯзро ба онҳо муборакбод гуфтанд. Муовини Раиси вилояти Суғд Зайнура Азимӣ кумакҳои молиявии Раиси вилояти Суғд Раҷаб Аҳмадзодаро ба собиқадорон тақдим намуд.

Собиқадорон бо шукргузорӣ аз сиёсати хирадмандонаи Пешвои муаззами миллат муҳтарам Эмомалӣ Раҳмон ва фазои сулҳу суботи кишвар баҳри боз ҳам гул-гулшукуфоии кишвари азизамон, таҳкими Ваҳдати миллӣ ва пойдору устувор мондани Истиқлоли давлатӣ дасти дуо бардоштанд.

Паёми табрикии Раиси шаҳри Гулистон Илҳом Пӯлотзода ба ифтихори ҷашни байналмилалии Наврӯз

Ҳамдиёрони азиз!
Фарорасии ҷашни Наврӯзи байналмилалӣ, ҷашни эҳёи табиат, ибтидои пешомадҳои нав, оғози ниятҳои баҳорӣ ва нақшаву тадбирҳои тозаро ба ҳамаи Шумо табрик гуфта, бароятон тандурустӣ, бахту иқболи баланд, рӯзгори пурсаодат, файзу баракати наврӯзӣ ва барору комёбиҳо орзу менамоям.
Наврӯз ҷашни бузурги миллии мо – тоҷикон ва оғози соли нави аҷдодӣ аст, ки ба пешвози фарорасии он табиат ва тамоми мавҷудоти олам эҳё мешавад ва дар ҷону руҳи инсонҳо умед ба зиндагӣ ва дӯст доштани он дигарбора зинда мегардад.

Яъне Наврӯз айёми гузариш ба фасли нави зиндагӣ, пирӯзии гармӣ бар сардӣ, ҷашни равшанӣ ва нур, дӯстиву муҳаббат, шодиву хурсандии ҳамагонӣ ва шукуфтани орзуҳо мебошад.

БАРГУЗОРИИ ФЕСТИВАЛ-ОЗМУНИИ ШАҲРИИ "ЯК МАТОЪВУ САД РАНГ" ВА НАМОИШ-ФУРӮШИ МАҲСУЛОТИ ЧАКАН, НАҚШДӮЗИВУ ЗАРДӮЗӢ

Тибқи нақшаи чорабиниҳои бахши кор бо занон ва оилаи  Мақомоти иҷроияи ҳокимияти давлатии шаҳри Гулистон дар Кохи фарҳангии "Истиқлол"-и маркази шаҳр даври шаҳрии Фестивал–озмуни ҷумҳуриявии «Як матоъву сад ранг» ва намоиш-фурӯши маҳсулоти чакан, нақшдӯзиву зардӯзӣ дар сатҳи баланд баргузор гардид.
Дар чорабинии мазкур муовини Раиси шаҳри Гулистон Муслимахон Ҷамолиён, мудири бахши кор бо занон ва оилаи мақомоти иҷроияи ҳокимияти давлатии шаҳри Гулистон Матлуба Сатторова, мудири бахши фарҳанги шаҳр Дилноза Каримова, раиси Шурои собиқадорони ҷанг ва меҳнати шаҳри Гулистон Каромат Қосимова иштирок ва суханронӣ намуданд.