ҲИФЗИ АРЗИШҲОИ МИЛЛӢ РИСОЛАТИ ШАҲРВАНДИСТ!

Санаи 16.12.2025 дар толори хурди Мақомоти иҷроияи ҳокимияти давлатии шаҳри Гулистон вохӯрӣ бо ҷавонон таҳти унвони "Ҳифзи арзишҳои миллӣ рисолати шаҳрвандист!" ва маросими шиносномадиҳӣ баргузор гардид. Дар вохӯрии мазкур муовини Раиси шаҳр Муслимахон Ҷамолиён ва сардори хадамоти шиносномадиҳӣ ва бақайдгирии ШВКД Ҷумҳурии Тоҷикистон дар шаҳри Гулистон майори милится Далер Ҳалимзода иштирок ва суханронӣ намуданд.

Таъкид гардид, ки имрӯз мебояд асоси тафаккури нави сиёсӣ ва фарҳангии шаҳрвандон ба хусус ҷавононро ғояи таҳкими истиқлолияти давлатӣ, ваҳдату худшиносии миллӣ, ҳисси ватандӯстиву ватанпарастӣ, таъмини амнияти давлату миллат, ҳифзи тамомияти арзӣ ва манфиатҳои умумимиллӣ ва эҳтиром ба шиносномаи миллӣ ташкил диҳад. Арзишҳои умумимиллӣ ва умумидавлатии Тоҷикистони соҳибистиқлол ва ҳифзи манфиатҳои кишвар бояд аз ҳама гуна манфиатҳои сиёсӣ, мазҳабӣ ва гурӯҳӣ боло бошад ва пойдевори тарбияи ватандӯстии ҷавононро фаро гирад. Ҷавонон бояд муҳофизони боэътимоди Ватан, амнияти давлату миллат, сарчашмаи ташаббусҳо ва манбаи асосии кадрҳои ояндаи кишвар бошанд. Онҳо дар дигаргунсозиҳои демокративу иқтисодии Тоҷикистон такягоҳи боэътимод ва ҷузъи ҷудонопазири муносибатҳои байни ҷомеаи шаҳрвандӣ ва давлат мебошанд.

ҲАРАКАТИ ҶУМҲУРИЯВИИ НИҲОЛШИНОНӢ - ОҒОЗИ МАЪРАКАИ НИҲОЛШИНОНӢ ДАР ГУЛИСТОН

Дар доираи Ҳаракати ҷумҳуриявии ниҳолшинонӣ имрӯз, 17.01.2026 дар шаҳри Гулистон маъракаи ниҳолшинонӣ оғоз ёфта, дар маркази шаҳр ва гардиши осоишгоҳи «Баҳористон»-и шаҳри Гулистон беш аз 800 бех ниҳоли дарахтони ороишию ҳамешасабзи навъи сасна, маживилник ва акатсияи сафед шинонида шуд.

Дар оғози маъракаи ниҳолшинонӣ Раиси шаҳри Гулистон Илҳом Пӯлотзода иштирок намуда, зикр кард, ки бо истифода аз боду ҳавои мусоид нақшаи ниҳолшинонӣ дар шаҳр бояд вусъат дода шавад.

Ин тадбири муҳими экологӣ дар шаҳр асосан бо ташкили ҳашарҳои дастҷамъона вусъат ёфта, дар назар аст, ки соли ҷорӣ дар кӯчаю хиёбонҳо ва мавзеъҳои алоҳидаи шаҳр беш аз 8 ҳазор бех ниҳоли дарахтони ҳамешасабзу ороишӣ шинонида мешавад.

Шиносоии Раиси вилояти Суғд бо сохтмони корхонаи нави саноатӣ дар шаҳри Гулистон

Раиси вилояти Суғд Раҷаб Аҳмадзода дар шаҳри Гулистон бо ҷараёни сохтмони корхонаи нави саноатӣ шинос гардид.

Бо саҳми Ҷамъияти дорои масъулияти маҳдуди «Дилроз-Ғаюр» дар шаҳри Гулистон корхонаи саноатӣ дар самти истеҳсоли нахҳои базалтии гармнигоҳдоранда бунёд шуда истодааст. Ин иқдоми муҳим дар доираи сиёсати саноатикунонии босуръати кишвар ва бо ҷалби сармояи хусусӣ амалӣ мегардад.

Тавре зимни боздид ба Раиси вилояти Суғд Раҷаб Аҳмадзода иттилоъ дода шуд, корхонаи мазкур бо саҳми соҳибкорони ватанӣ дар ҳамкорӣ бо шарикони рушд аз Ҷумҳурии Мардумии Чин бунёд ёфта, иқтидори истеҳсолии он 50 ҳазор тонна нахҳои базалтии гармнигоҳдоранда дар як солро ташкил медиҳад.

Мулоқоти Раиси вилояти Суғд бо директори генералии “Ширкати кӯҳӣ-саноатии Тоҷикистону Хитой”

Дар мулоқоти Раиси вилояти Суғд Раҷаб Аҳмадзода бо директори генералии Ҷамъияти дорои масъулияти маҳдуди “Ширкати кӯҳӣ-саноатии Тоҷикистону Хитой” масоили марбут ба дурнамои рушди фаъолияти корхона, афзун намудани нишондиҳандаҳои истеҳсолӣ ва иҷрои уҳдадориҳо дар соли ҷорӣ мавриди баррасӣ қарор гирифтанд.

Раиси вилояти Суғд Раҷаб Аҳмадзода дар оғози мулоқот зикр намуд, ки бо сиёсати хирадмандона ва дурнигаронаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳаи саноат дар кишвар ба яке аз бахшҳои муҳими рушди иқтисод табдил ёфта, сол аз сол ҳаҷм ва номгӯи маҳсулоти саноатӣ афзоиш меёбад. Таъкид гардид, ки соли 2025 ҳаҷми истеҳсоли маҳсулоти саноатӣ дар вилояти Суғд ба 39 миллиарду 146,4 миллион сомонӣ расида, суръати рушди соҳа 123,5 фоизро ташкил додааст.