Иштироки Пешвои миллат Эмомалӣ Раҳмон дар тантанаҳои ҷашни Наврӯзи ҷаҳонӣ дар “Наврӯзгоҳ”-и шаҳри Душанбе

Нимаи дуюми рӯзи 22 март Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Раиси шаҳри Душанбе муҳтарам Рустами Эмомалӣ дар тантанаҳои бошукӯҳи идонаи наврӯзи ҷаҳонӣ, ки дар “Наврӯзгоҳ” — и пойтахт баргузор гардид, иштирок ва суханронӣ карданд.

Зимни суханронии табрикотии худ Президенти мамлакат муҳтарам Эмомалӣ Раҳмон ҳамаи ҳамватанон, сокинони пойтахт ва меҳмононро бо иди бошукуҳи Наврӯзи байналмилалӣ, ҷашни эҳёи табиат, ибтидои пешомадҳои нав, оғози ниятҳои баҳорӣ ва нақшаву тадбирҳои тоза табрику таҳният гуфтанд.Таъкид гардид, ки имрӯзҳо мардуми шарифи Тоҷикистон, аз ҷумла сокинони пойтахти кишвари азизамон — шаҳри Душанбе бо шукргузорӣ аз сулҳу суботи комил, ойини бостонии милливу мардумӣ ва соли нави аҷдодиамон — Наврӯзи оламафрӯзро бо хурсандиву хушҳолии зиёд таҷлил менамоянд.

НАВРӮЗИ ФАРХУНДАПАЙ ДАР ГУЛИСТОН

Сокинони шаҳри соҳили “Баҳри тоҷик” дар шафати роҳи асосии кӯчаи Истиқлоли маркази шаҳр бо гузоштани хаймаҳои наврӯзии ҷамоати шаҳраҳо, корхонаву муассиса ва идораҳо Наврӯзи байналмилалиро бо шукӯҳу шаҳомати хосса таҷлил намуданд.

Ҷамоати шаҳракҳои Адрасмон, Консой, Чоруқдаррон ва Зарнисор бо дастаҳои ҳунарӣ ва намоиши ҳунарҳои мардумӣ оину русуми наврӯзии марбут ба маҳалли зисти худ намоиш дода, сокинон ва меҳмононро бо он ошно намуданд. Ҷомеаҳои меҳнатии ҶСК “Қолинҳои Қайроққум”, Шабакаҳои барқи Суғд, ҶДММ “Осоишгоҳи Баҳористон”, КВД “Осоишгоҳи Шифо” дасторхонҳои ҳафтсину ҳафтшини пурғановатро манзури ҳамагон намуда, намояндагони соҳаҳои маориф ва тандурустӣ намунаи анъанаҳои қадимии наврӯзиро хеле ҷаззоб ва ҷолиб ба маърази тамошо гузоштанд. Меҳмонон аз завқи наврӯзӣ ва рӯҳияи болидагии мардуми гулистонӣ ба ваҷд омада, ба маҳорат ва малакаи дасторхонороӣ ва пазироии онҳо аҳсант хонданд.

АЁДАТИ НАВРӮЗӢ

Раиси шаҳри Гулистон Фирдавс Шарифзода ва намояндаи мақомоти иҷроияи ҳокимияти давлатии вилояти Суғд Муқаддам Ҳошимзода ба ифтихори иди байналмилалии Наврӯзи Аҷам гурӯҳи собиқадорони меҳнатро аз номи Раиси вилояти Суғд Раҷаббой Аҳмадзода аёдат намуданд. Аз ҷумла собиқадорон Муҳсин Раҳимов, Қаҳрамони меҳнат, шаҳрванди фахрии Гулистон, заҳматкаши ақибгоҳ Саломат Болтаева, собиқадорони аҳамияти вилоятӣ ва ҷумҳуриявӣ дошта Қурбоной Раҷабова, Гулбибӣ Сафарова, Абдуҳафиз Латифов ва Ғайбулло Зайниддинов аёдат карда шуда, ба онҳо туҳфаҳои Раиси вилояти Суғд ва Раиси шаҳри Гулистон супорида шуданд.

Ҳамзамон, аз тарафи мақомоти иҷроияи ҳокимияти давлатии шаҳр, ҷамоати шаҳракҳо, корхонаву ташкилот, идораву муассисаҳо ва соҳибкорони шаҳр ба беш аз 600 нафар қишри ниёзманди ҷомеа, пирони яккаву танҳо, ашхоси имконияташон маҳдуд, оилаҳои бесаробонмонда аёдат карда шуда, ба онҳо туҳфаҳои наврӯзӣ супорида шуд.

Муборакбодии Раиси шаҳри Гулистон Фирдавс Шарифзода ба ифтихори Наврӯзи байналмилал

Гулистониёни гиромиқадр!

Ба сарзамини соҳибистиқлоли мо боз иди мубораку файзбахши баҳор ва ҷашни қадимтарину зеботарини аҷдодӣ – Наврӯзи оламафрӯзи байналмилал қадами мубораку ҳаётофарини худро гузошт. Наврӯз барои миллати мо чун соли нави аҷдодӣ ва иди баҳор арзиши бузург дошта, боиси ифтихору сарбаландии ҳар як фарди ватандӯсти Тоҷикистон мебошад. Дар ҳама давру замон мардуми соҳибтамаддуни тоҷик иди Наврӯзро дар баробари дигар халқҳои ориёӣ истиқбол менамуд. Наврӯз иди бузургтарини миллӣ маҳсуб ёфта, ҳамчун дақиқтарин шинохти гардиши офтоб, баробарии шабу рӯз, дарки тағйирёбии авзои табиат, фарорасии фасли баҳору айёми шукуфоӣ ва посдории инсону табиат мақому мартабаи баланд дорад.