Конститутсия – бахтномаи миллат

Дар Кохи фарҳангии «Истиқлол» бахшида ба 22-юмин солгарди  Рӯзи қабули Конститутсияи  Ҷумҳурии Тоҷикистон ҷасаи тантанавӣ доир гардид.

Раиси шаҳри Гулистон Сатториён Матлубахон Амонзода гулистониёнро бо ин рӯзи саиду фархунда муборакбод намуда, зикр кард, ки бузургӣ ва аҳамияти ин санади муҳимми таърихӣ, пеш аз ҳама, дар он ифода меёбад, ки он бори нахуст аз ҷониби худи халқ ва барои халқ бо роҳ ифодаи озодонаи майлу иродаи шаҳрвандони мамлакат қабул карда шудааст.

Табрикоти Раиси шаҳри Гулистон Сатториён Матлубахон Амонзода ба муносибати 22-юмин солгарди қабули Конститутсияи Ҷумҳурии Тоҷикистон

Гулистониёни азиз!

Бисту ду сол муқаддам дар кишвари мо тавассути райъпурсии умумихалқӣ нахустин Конститутсияи Тоҷикистони соҳибистиқлол, яъне бахтномаи халқамон қабул гардид ва мо ин рӯзи воқеан таърихиро ҳар сол бо доир намудани чорабиниҳои сазовори ин санади сарнавиштсоз таҷлил мекунем.

Бузургӣ ва аҳамияти ин санади муҳимми таърихӣ, пеш аз ҳама, дар он ифода меёбад, ки он бори нахуст аз ҷониби худи халқ ва барои халқ бо роҳҳ ифодаи озодонаи майлу иродаи шаҳрвандони мамлакат қабул карда шудааст.

Бо қабули Конститутсия халқи Тоҷикистон дар айёми ниҳоят ҳассоси таърихӣ бори дигар исбот кард, ки ҳеҷ гуна душвориву мушкилот, аз ҷумла ҷанги даҳшатбори ба сари давлат ва мардуми Тоҷикистон таҳмилшуда наметавонанд сокинони сулҳдӯсту созандаи кишвари моро аз роҳи ҳақиқату ростӣ, эъмори давлати муосири миллӣ ва фаъолияти бунёдкорона берун созанд.

Ба ифтихори Рӯзи Конститутсия

Дар толори Кохи варзишии «Истиқлол»-и маркази шаҳр бахшида ба 22-юмин солгарди Рӯзи Конститутсияи Ҷумҳурии Тоҷикистон  мусобиқаи волейбол байни 6 дастаи бонувони корхонаву муассисаҳо ва ташкилотҳои шаҳр баргузор гардид. Мусобиқа бо ҷамъи зиёди мухлисон ва муборизаи шадиди байни дастаҳо хеле хотирмону шавқовар ба вуқӯъ пайваст.

Дар ҷамъбасти ниҳоӣ дастаи волейболбозони МТМУ № 14 ҷойи аввал, дастаи яккачини Муассисаи кӯмаки аввалияи тиббию санитарӣ ҷойи дуюм ва дастаи бонувони Беморхонаи марказӣ ҷойи сеюмро ишғол намуданд. Дастаи яккачини волейболбозони бахши фарҳанг сазовори ҷоизаи «Дастаи фаъол» гардид. Ба ғолибони мусобиқа туҳфаҳо ва дипломҳои бахши ҷавонон, варзиш ва сайёҳӣ супорида шуданд.

Тарвиҷи тарзи ҳаёти солим

Дар толори хурди мақомоти иҷроияи ҳокимияти давлатии шаҳри Гулистон иҷлосияи 8-уми Маҷлиси вакилони халқи шаҳр (даъвати панҷум) баргузор гардид. Иҷлосия бо иҷрои Суруди Миллии  Ҷумҳурии Тоҷикистон ифтитоҳ ёфта, раиси Маҷлиси вакилони халқи шаҳри Гулистон Матлубахон Амонзода вакилон ва даъватшудагонро бо регламенти иҷлосия ва рӯзномаи он шинос намуд. Пас аз интихоби котиботи иҷлосия роҷеъ ба масъалаи асосии иҷлосия «Дар бораи татбиқи Барномаи милллии ташаккули тарзи ҳаёти солим дар Ҷумҳурии Тоҷикистон барои солҳои 2011-2020» муовини раиси шаҳри Гулистон Ғайратҷон Оқилов маърӯза кард. Дар маъруза зикр гардид, ки тибқи Барномаи миллӣ ва қарори дахлдори Раиси вилояти Суғд қарори дахлдори Раиси шаҳри Гулистон аз 27 январи соли 2011 ба тасвиб расида, дар он Низомномаи Шӯрои ҳамоҳангсозии “Барномаи миллии ташаккули тарзи ҳаёти солим дар  Ҷумҳурии Тоҷикистон барои солҳои 2011-2020” ва нақшаи чорабинҳо иборат аз 46 банд таҳия ва қабул гардидааст.

Баҳри амалӣ гардонидани Барномаи мазкур дар шаҳр Маркази ташаккули тарзи ҳаёти солим иборат аз 6 воҳиди корӣ фаъолияти худро пурсамар ба роҳ мондааст. Аз соли 2011 то инҷониб аз буҷети маҳаллӣ 15,9 ҳазор сомонӣ барои таҷҳизонидан ва таъмири ҳуҷраҳои Марказ ҷудо шудааст. Аз тарафи Марказ дар ин давра барои баланд бардоштани сатҳи маърифатнокии аҳолӣ доир ба пешгирии бемориҳои сироятӣ ва ғайрисироятӣ, тарғиби доимии ташаккули тарзи ҳаёти солим беш аз 11784 суҳбатҳо, 239 лексияҳо, 223 дарсҳои семинарӣ, 60 вохӯриву мулоқотҳо, 3 маротиба мизи мудаввар, 3 маротиба аксия ва дӯкони саломатӣ ба вуқӯъ пайвастааст. Баҳри амалӣ гаштани ҳадафҳои Барнома Шӯрои байниидоравии ҳамоҳангсозии ташаккули тарзи ҳаёти солим таъсис ёфта, ҷаласаҳои Шӯро 2 маротиба дар як сол гузаронида, қарорҳои дахлдор қабул мешаванд.