Омодагӣ ба раъйпурсӣ

Чоруқдаррон. Омодагӣ ба раъйпурсии умумихалқӣ доири тағйиру иловаҳо ба Конститутсияи (Сарқонуни) Ҷумҳурии Тоҷикистон рўз то рўз вусъати тоза мегирад. Рўйхати 1950 нафар раъйдиҳандагон тартиб дода шудааст. Тибқи талабот ва меъёри баргузории Қонуни конститутсионии Ҷумҳурии Тоҷикистон “Дар бораи раъйпурсии Ҷумҳурии Тоҷикистон” ҳуҷҷатҳои зарурӣ, ҳуҷраҳои овоздиҳӣ, гўшаи раъйдиҳанда ва қуттӣ барои бюллетенҳо омода аст.

-Бо ҳадафи зарурияти тағйиру иловаҳоро ба аҳолӣ аз моҳият ва муҳтавои ин маъракаи муҳими сиёсӣ, ки тақозои замон аст фаҳмонидан гурўҳҳои корӣ дар ҳафт маҳаллаҳои шаҳрак тадбирҳои мушаххасро пайи роҳандозианд, - аснои суҳбат иброз дошт, раиси комиссияи участакаи раъйпурсии №18 Қўшназар Самадов.

Футбол

2-юми май дар толори варзишии Маркази солимгардонии кўдакону наврасони ба номи Абдураҳмони Ҷомии ҶДММ “Шоҳин” вохўрии рафиқонаи дастаҳои “Сипар”-и Соҳибкорбанк ва “Кўҳкан”-и Зарнисор дар доираи чорабиниҳои идона ба истиқболи 9-уми май доир гашт.

Дастаи “Сипар” нисбати ҳарифони хеш хубтар бозӣ намуда ба ҳисоби 8:7 пирўзиро соҳиб шуд.

“20 рўзи ҷавонон”- идома дорад

“Ҷавонон пайрави Пешвои миллат ва муҳофизони дастовардҳои 25 соли Истиқлолияти давлатии Ҷумҳурии Тоҷикистон” – таҳти чунин унвон силсилаи чорабиниҳо ҷиҳати дар сатҳи баланди сиёсию фарҳангӣ ва ташкилӣ гузаронидан ба муносибати Рўзи ҷавонони Тоҷикистон тайи 20 рўз идома дорад.

Марбут ба ин самт қарори навбатии Раиси шаҳри Гулистон низ ба тасвиб расидааст.

Чорабинии судманд дар муассисаи таълимӣ

Дар МТМУ-и №14 оид ба фаҳмонидани паҳлўҳои гуногуни Қонуни ҶТ “Дар бораи масъулияти падару модар дар таълиму тарбияи фарзанд” ва пешгирии шомилшавии ҷавонон ба ҳизбу ҳаракатҳои иртиҷоӣ вохўрӣ баргузор гардид.

Мудири шуъбаи кор бо ноболиғони Маркази таҳсилоти иловагии Раёсати маорифи вилоят М.Миркамолов, кормандони Маркази номбурда С.Қобилова, Л.Гадойбоева ва мушовири кабинети методӣ оид ба тарбияи шуъбаи маориф Ф.Фаридунова назди ҳозирин андешаронӣ карданд.