Ҷаласаи Шӯрои собиқадорон

Дар толори бахши ҳифзи миҳити зист ҷаласаи васеи Шӯрои собиқадорони ҷангу меҳнати шаҳри Гулистон доир гардид.

Раиси Шӯрои собиқадорони ҷангу меҳнати шаҳр Муҳаммадҷон Файзуллоев доир ба таърихи 30 солаи Шӯро сухан ронда, тазаккур дод, ки Шӯрои собиқадорон аз соли 1987 фаъолият бурда, дар дарозои ин солҳо корҳои зиёди тарғиботӣ-ташвиқотӣ, мулоқоту вохӯриҳо ташкил ва гузаронида шуда, имрӯз собиқадорон дар тамоми чорабиниҳои шаҳрӣ фаъолона ширкат меварзанд. Дар музокира раиси ташкилоти «Ҳифзи Ватан» Бозор Ғуломов ва муҳофизи сохти конститутсионӣ Зариф Пӯлодов иштирок намуданд. Дар охир аз номи мақомоти иҷроияи ҳокимияти давлатии шаҳр ба фаъолзанони собиқадор туҳфаҳои ҷашнӣ супорида шуд.

Аёдати модарон

Онҳое, ки барои ин Ватан ва пешрафти ҷомеа хизмат кардаанд, ҳеҷ гоҳ аз мадди назарҳо дур намонда, кору пайкори эшон фаромӯш нахоҳад шуд.

Бо дарназардошти хизматҳои шоиста ва фаъолияти меҳнативу ҷамъиятӣ бахшида ба Рӯзи модар як гурӯҳ модарон, ки фарзандони онҳо дар барқароркунии сохти конститутсионӣ ширкат варзидаанд, аз ҷумла Лутфинисо Ҳусанбоева, Соидахон Мансурова, Барчинисо Бобоева, Мавҷуда Каримбердиева, Санавбархон Миркамолова ва Калинина Лидия Ивановна аёдат карда шуданд.

Шанбегӣ дар Чоруқдаррон

Дар Ҷамоати шаҳрак баҳри тозагии муҳити зист ва ободу зебо нигоҳ доштани кӯчаву хиёбон шанбегӣ доир карда шуд.

Дар ин ҳашари умумӣ ҳамаи кормандони корхонаҳои шаҳрак, хонандагони мактаб ва аҳолӣ ширкат намуда, назди коргоҳу муассисаҳо ва роҳраву хиёбонҳоро аз партовҳо тоза намуданд. Ҳамчунин дар ин рӯз беш аз сесад бех ниҳолҳои сояафкану ороишӣ бо ташаббуси мардум ва кормандони соҳаҳои маорифу тандурустӣ шинонида шуд.

Муборакбодии Раиси шаҳри Гулистон Сатториён Матлубахон Амонзода ба муносибати иди Рўзи Модар

Модарон ва хоҳарони арҷманд!

Бонувони азиз!

Ба ифтихори ҷашни фархундаи Рўзи модарон, ки дар оғози фасли зебои баҳор ва дар арафаи соли нави аҷдодӣ фаро мерасад, тамоми модарону бонувони гиромӣ ва духтарони азизи Гулистонро самимона табрик гуфта, ба ҳар кадоми шумо саломативу хушбахтӣ ва хонаободиву саодати рўзгор орзу менамоям.

Ба оғози эҳёи табиат – фасли рўидани сабза, шукуфтани гулҳо ва ҷомаи сабзи баҳорӣ ба тан кардани дашту саҳрои сарзамини зебоямон рост омадани Рўзи модар рамзи басо неку хуҷаста мебошад.

Чунки агар баҳор оғози эҳёи табиат ва зиндагӣ, ибтидои нақшаву ниятҳо ва ташаббусу иқдомоти тоза, омодагӣ ба киштукор ва оғози нави корҳои ободониву созандагӣ бошад, модар худ сарчашмаи зиндагӣ ва бахшандаи ҳаёт мебошад.