БАРГУЗОРИИ ЯРМАРКАИ ФУРӮШИ МАҲСУЛОТИ КИШОВАРЗӢ

Дар партави дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба муносибаи Иди саиди Фитр дар шаҳри Гулистон ярмарка фурӯши маҳсулоти кишоварзӣ баргузор карда шуд.

Дар ярмарка маҳсулоти ниёзи аввал бо нархи нисбатан арзонтар аз бозор пешниҳоди сокинон карда шуд. Сокинон дар остонаи таҷлили Иди саиди Фитр амали мазкурро бо хушнудӣ қабул намуданд. Амали мазкур рӯзи якшанбе низ баргузор мегардад.

Лозим ба зикр аст, ки баргузории ярмаркаҳои фурӯши маҳсулоти кишоварзӣ ҳар ҳафта рӯзи шанбе дар шаҳр ба роҳ монда мешавад.

"ГУЛИСТОН" БОЗИИ НАВБАТИИ ХУДРО ДОИР НАМУД

29-уми апрели соли 2022 дар доираи даври дуюми Чемпионати Тоҷикистон оид ба футбол миёни дастаҳои  Лигаи якум дастаи "Гулистон"-и шаҳри Гулистон дастаи "Ҳосилоти"-и ноҳияи Фархорро қабул намуд.

Дар қисми аввали дидор бозигарони ҳар ду даста кӯшишҳои зиёди боз намудани ҳисоби бозӣ намуда, аммо имкони рахна намудани хатти дарвозаи ҳамдигарро пайдо карда натавонистанд.

Қисмати дуюми бозӣ пурҳаяҷон ҷараён гирифт.  Бозигарони дастаи "Ҳосилот" дар ниҳоят ба боз намудани ҳисоби бозӣ муваффақ шуданд. Ҳуҷумҳои пайиҳами футболбозони гулистонӣ то фарҷоми бозӣ самар ба бор наовард. "Гулистон" бохти навбатии худро ба қайд гирифт. Лозим ба зикр аст, ки дастаи "Ҳосилот" соли қаблиро дар Лигаи олии кишвар паси сар карда буд ва яке аз довталабони қаҳрамонӣ дар Лигаи якум ба шумор меравад.

ПОКИЗАКОРОН АЗ ФАЙЗИ ИДИ САИДИ ФИТР БАРХУРДОР ГАРДИДАНД

Бо ташаббуси Мақомоти иҷроияи ҳокимияти давлатии шаҳр ва бо дастгирии соҳибкори саховатманд дар остонаи таҷлили Иди саиди фитр ба кормандони корхонаи воҳиди давлатии “Хоҷагии манзилию коммуналӣ”-и шаҳр кумаки якдафъинаи молиявӣ ва маводи ғизоӣ тақдим карда шуд.

Раъно Ҳошимзода иҷрокунандаи вазифаи Раиси шаҳр кормандони корхонаи воҳиди давлатии “Хоҷагии манзилию коммуналӣ”-и шаҳрро бо фарорасии Иди саиди Фитр муборакбод намуда, зикр кард, ки Иди саиди Фитр таҷассумгари беҳтарин арзишҳои инсонӣ, файзу баракат, хайру эҳсон ва рӯҳияи инсонпарварона ба ҳисоб меравад.

Бахшида ба Иди саиди Фитр ба ятимону камбизоатон кумак расонида шуд

Бо дастгирии соҳибкорони маҳаллӣ дар остонаи таҷлили Иди саиди Фитр ба 70 нафар ятимон ва камбизоатону ниёзмандон кумаки яквақта дар намуди маводи ғизоӣ расонида шуд.

Роҳбарияти шаҳр ятимону камбизоатон ва ниёзмандонро бо фарорасии Иди саиди Фитр муборакбод намуданд. Зикр карда шуд, ки фарзандони ятим ва камбизоат дар меҳвари таваҷҷуҳи роҳбарияти олии кишвар қарор дошта, Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба қишри ояндасози ҷомеа пайваста ғамхорӣ ва дастгирӣ менамоянд.

Бо ҳидоятҳои Сарвари кишвар ва ташаббуси мақомоти иҷроияи ҳокимияти давлатии шаҳр дар арафаи ҳамаи идҳои суннатӣ аз ҷониби корхонаву ташкилотҳо ва соҳибкорону шахсони эҳсонкор ба қишри ниёзманди ҷомеа ятимону камбизоатон  кумак расонида мешавад.