ТАБРИКОТИ РАИСИ ШАҲРИ ГУЛИСТОН ИЛҲОМ ПӮЛОТЗОДА БА МУНОСИБАТИ РӮЗИ ДОНИШ

Муҳтарам омӯзгорон, хонандагон ва донишҷӯёни гиромӣ!

Боиси ифтихор аст, ки мардуми шарифи Тоҷикистон дар остонаи бузургтарин ҷашни миллӣ - 34-умин солгарди Истиқлоли давлатии Ҷумҳурии Тоҷикистон қарор доранд. Имрӯз аз файзу баракати Истиқлол ва суботу амнияти кишвари азизамон муассисаҳои таълимӣ чун анъана дарҳои худро ба рӯи хонандагон боз намуда, онҳоро боз ба оғӯши маърифату маънавият фаро мегиранд.

Ба муносибати Рӯзи дониш кулли хонандагону омӯзгорону донишҷӯёнро самимона муборакбод гуфта, бароятон дар соли нави таҳсил муваффақияту комёбиҳои беназирро таманно менамоям.

Давлати соҳибистиқлоли мо дар партави сиёсати маорифпарваронаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пайваста ба инкишофи илму маърифат, такомули раванди таълиму тарбия ва баланд бардоштани сатҳи маънавиёти ҷавонон ғамхорӣ зоҳир менамояд.

Пешвои муаззами миллат муҳтарам Эмомалӣ Раҳмон дар яке аз Паёми хеш ба Маҷлиси Олии кишвар таъкид намудаанд, ки: "Мо мактабро ба ҳайси боргоҳи илму дониш, саводу маърифат ва омӯзгорро чун шахси мафкурасозу тарбиятгари насли наврас эътироф карда, ба онҳо арҷу эҳтиром гузоштанро аз ҷумлаи масъалаҳои муҳимтарин медонем. Зеро агар мактаб ва омӯзгор набошад, сатҳи маърифатнокии мардум паст мегардад, миллат бесавод мемонад, ҷомеа ба ҷаҳолат гирифтор мешавад ва дар натиҷа оромиву сулҳу субот, амнияту осоиш ва муҳимтар аз ҳама, рушди давлат сахт халалдор мегардад"

ДАСТГИРИИ ЯТИМОН ДАР ОСТОНАИ СОЛИ НАВИ ХОНИШ

Дастгирии қишри ниёзманди ҷомеа яке аз самтҳои асосии сиёсати иҷтимоии давлат маҳсуб ёфта, тибқи дастуру супоришҳои доимии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Гулистон бахшида ба иду ҷашнҳои давлатӣ ва суннатӣ ба онҳо пайваста кумакҳои модиву молиявӣ мерасонад.

Санаи 29 августи соли 2025 дар МД "Маркази таҳсилоти иловагии шаҳри Гулистон" ба 30 нафар ятимони кулл бо дастгирии соҳибкори маҳаллӣ, вакили Маҷлиси вакилони халқи шаҳри Гулистон Турсуной Зокирова кумаки молиявӣ ва шириниҳо тақдим гардид.

Муовини Раиси шаҳри Гулистон Муслимахон Ҷамолиён зимни суҳбат бо хонандагон таъкид намуд, ки дастгирии ятимону қишри ниёзманди аҳолӣ ҳамеша дар зери назари Ҳукумати Ҷумҳурӣ қарор дорад. Дар шаҳри Гулистон низ бо дастгирии чунин ашхоси саховатпеша ва дастгириҳои мақомоти иҷроияи ҳокимияти давлатии шаҳр ин қишри ҷомеа ҳамеша ба ғамхорӣ фаро гирифта мешаванд.

ТАВАҶҶУҲ БА РУШДИ СОҲАИ ҲУНАРМАНДӢ

Санаи 29.08.2025 дар ФМД "Маркази рушди ҳунармандӣ ва малакаҳои касбии муосир" дар шаҳр бо иштироки бонувони ҳунарманд семинар баргузор гардид.

Дар кори семинар муовини Раиси шаҳри Гулистон Муслимахон Ҷамолиён, директори ФМД "Маркази рушди ҳунармандӣ ва малакаҳои касбии муосир" ва мутахассиси рушди ҳунармандӣ дар маркази мазкур Озода Тошматова иштирок ва суханронӣ намуданд.

Таъкид карда шуд, ки имрӯз дар Ҷумҳурии Тоҷикистон ҳавасмандгардонӣ ва имтиёздиҳӣ ба рушди ҳунарҳои мардумӣ аз ҷониби Пешвои миллат муҳтарам Эмомалӣ Раҳмон саривақтӣ ва бисёр муҳим арзёбӣ гардида, метавонад ба ташкил ёфтани ҷойҳои нави корӣ ва беҳтар шудани имконияти иҷтимоию иқтисодии оилаҳо мусоидат намояд.

КУРСИ "ЗАН - САРВАР" ҶАМЪБАСТ ГАРДИД

Аз 26.08.2025 то 28.08.2025 дар Муассисаи давлатии "Маркази таҳсилоти иловагӣ"-и шаҳри Гулистон машғулиятҳои курси кутоҳмуддати «Зан сарвар» ҷараён гирифт. Шунавандагони курс машғулиятҳоро аз рӯйи нақша фаро гирифтанд.

Дар ҷамъбасти курс муовини Раиси шаҳри Гулистон Муслимахон Ҷамолиён таъкид намуд, ки тайи солҳои соҳибистиқлолӣ таҳти роҳбарии бевоситаи Президенти Чумҳурии Тоҷикистон, Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон Ҳукумати Ҷумҳурии Тоҷкистон тавонист, ки барои беҳбудии вазъи занон таваҷҷуҳи хоса зоҳир намояд. Таҳия ва қабул гардидани як қатор барномаву стратегияҳо ва санадҳои меъёриву ҳуқуқӣ дар самти беҳдошти вазъи занон барои беҳтар намудани сатҳи иҷтимоию иқтисодӣ, фарҳангию маърифатии оилаҳо, пешгирии зуроварӣ нисбати занон, баланд бардоштани мақоми зан дар ҷомеа, иштироки фаъолонаи онҳо дар идоракунии давлат, омода намудани кадрҳои болаёқату донишманд аз ҳисоби занону духтарон ва баланд бардоштани маърифати ҳуқуқии занон мусоидат намудаанд. Аз ин ҷост, ки бо мақсади ҷалб ва пешбарӣ намудани занҳо ба вазифаҳои роҳбарикунанда бо Қарори Ҳукумати Ҷумҳурии Тоҷикистон Барномаи давлатии «Тарбия, интихоб ва ҷобаҷогузории кадрҳои роҳбарикунандаи Ҷумҳурии Тоҷикистон аз ҳисоби занону духтарони лаёқатманд барои солҳои 2023-2030» қабул гардид, ки барои баланд бардоштани обрўву нуфузи зани тоҷик дар арсаи сиёсат ва афзудани теъдоди занон дар сатҳи роҳбарикунанда замина гузошт.