БАРРАСИИ БАРНОМАИ МАЪРИФАТИ ЭКОЛОГӢ

Дар толори бахши муҳити зисти шаҳри Гулистон бо иштироки намояндагони ҷамоати шаҳракҳо, корхонаву муассисаҳо ҷаласа оид ба баррасии Барномаи давлатии комплекси рушди тарбия ва маърифати экологии аҳолии Ҷумҳурии Тоҷикистон дар давраи то соли 2020 баргузор гардид.

Ҷаласаро сардори бахши муҳити зисти шаҳри Гулистон Хуршед Салимов ҳусни ифтитоҳ бахшид. Сипас сармутахассиси Раёсати ҳифзи муҳити зисти вилояти Суғд Хуршед Саидов доир ба ҷараёни татбиқи барномаи номбурда сухан ронда, доир ба рафти санҷиш аз ҷараёни татбиқи Барномаи давлатии комплекси рушди тарбия ва маърифати экологии аҳолии Ҷумҳурии Тоҷикистон дар давраи то соли 2020 дар ҳудуди шаҳри Гулистон ва вазифаҳои дар пеш истода ибрози андеша намуд.

Шиносоии Раиси вилоят бо рафти бунёди иншооти гуногун дар шаҳрҳои Бӯстону Гулистон ва ноҳияи Бобоҷон Ғафуров

12 феврали соли равон Раиси вилояти Суғд Раҷаббой Аҳмадзода бо мақсади шиносоӣ бо ҷараёни корҳои ободониву бунёдкорӣ ба шаҳрҳои Бӯстону Гулистон ва ноҳияи Бобоҷон Ғафуров сафари корӣ анҷом дод.

Дар доираи омодагиҳо ба ҷашни 30-солагии Истиқлолияти давлатии Ҷумҳурии Тоҷикистон дар шаҳри Бӯстон сохтмони як зумра иншооти муҳими иҷтимоӣ ҷараён дошта, дар назар аст, ки то соли 2021 дар шаҳр 150 иншоот бунёд ва мавриди истифода қарор дода шавад.

Зимни боздиди корӣ аз шаҳри Бӯстон Раиси вилоят рафти корҳои сохтмониро дар як қатор иншоот, аз ҷумла кӯдакистони замонавӣ ва маҷмааи хизматрасонӣ, ки аз тарабхона, маркази савдо, кошонаи ҳусн, меҳмонхона ва дорухона иборат аст, мавриди таваҷҷуҳ қарор дод ва ҷиҳати тезонидани суръати корҳо, ба ободониву кабудизоркунӣ фаро гирифтани муҳити зист ба роҳбарияти шаҳр дастуру супоришҳо дод.

ПАЁМ – РАҲНАМОИ ҶАВОНОН

ГУЛИСТОН. Баҳри тарғибу ташвиқи Паёми навбатии Пешвои муаззами миллат дар гимназияи ба номи академик Бобоҷон Ғафуров  мулоқот бо омӯзгорону хонандагон баргузор гардид. Инчунин дар мулоқот оид ба масъалаҳои маҳсуб ба ҷавонон ва пешгирии кирдорҳои номатлуб, ҷинояткорӣ, шомилшавӣ ба гурӯҳҳои ифротгаро ва дигар масоили марбути ҷавонон баррасӣ гардид. Зикр шуд, ки дар Паём мақоми ҷавонон махсус таъкид гардида, омӯхтани илмҳои замонавӣ, баланд бардоштани маърифату ҷаҳонбинӣ ва масъулияти ватандории ҷавонон дастур дода шудааст.

АДРАСМОН. Дар толори ҷамоати шаҳрак ва муассисаҳои таълимии №7 мулоқоти гурӯҳи тарғиботӣ доир ба тавзеҳи Паёми Президенти Ҷумҳурии Тоҷикистон бо сокинон ва омӯзгорону хонандагони синфҳои болоӣ ба вуқӯъ пайваст. Дар он нуктаҳои асосии Паёми навбатӣ тавзеҳ дода шуданд.

ТОҶИКИСТОН-ВАТАНИ ОБҲОИ ЗУЛОЛ

Ба ифтихори даҳсолаи байналмилалии “Об барои рушди устувор, солҳои 2018-2028” дар маркази таҳсилоти иловагӣ озмуни расмкашӣ дар мавзӯи "Тоҷикистон-сарчашмаи обҳои зулол" ташкил ва гузаронида шуд.

Дар озмуни шаҳрӣ мактабиёни муассисаҳои таълимии шаҳр иштирок намуданд. Тибқи шартҳои низомномаи озмун дастаи муассисаҳои таълимии рақами 7(Адрасмон) ва 2 (Чоруқдаррон) сазовори ҷои якум, гимназияи ба номи академик Бобоҷон Ғафуров (Гулистон) ва муассисаи таълимии рақами 14 (Гулистон) сазовори ҷои дуюм ва муассисаи таълимии рақами 13  (Адрасмон) сазовори ҷои сеюм гашта,  бо мукофоту дипломҳо қадрдонӣ карда шуданд. Ғолибон ба озмуни вилоятӣ роҳхат гирифтанд.