“СУҒДИЁН” ҒОЛИБИ “ОФАРИН”

Бахшида ба Рӯзи байналхалқии ҳифзи ҳуқуқи кӯдак дар кӯдакистони “Парасту” дар байни панҷ дастаи муассисаҳои таълимии томактабӣ  озмуни шаҳрии “Офарин” баргузор гардид.

Озмун аз рӯи панҷ шарт дар байни дастаҳо хеле шавқовар ва муташаккилона ба вуқӯъ пайваста, тарбиятгирандагон дар онҳо ҳунару малака, чусту чолокӣ ва маҳорати худро намоиш доданд. Дастаҳои “Суғдиён”, “Парасту”, “Офтобак”,  “Ситора”, “Наргис” дар озмун натиҷаҳои дилхоҳ ба даст оварда,  дастаи кӯдакистони “Суғдиён” ғолиби озмуни шаҳрии “Офарин” гардид.

Ба иштирокчиён ва ғолибони озмуни шаҳрӣ туҳфаҳои мақомоти иҷроияи ҳокимияти давлатии шаҳр дар вазъи тантанавӣ супорида шуданд.

ТАҶЛИЛИ ИДИ САРҲАДБОНОН

Дар қисмҳои сарҳадии воқеъ дар шаҳракҳои Адрасмон, Зарнисор ва Навгарзан ба ифтихори 25-солагии Қушӯнҳои сарҳадии чорабиниҳои фарҳангӣ-фароғатӣ аз тарафи масъулини ҷамоати шаҳракҳои номбурда тибқи супориши Раиси шаҳри Гулистон Фирдавс Шарифзода  ба вуқӯъ пайваст.

Зимни муборакбодии сарҳадбонон масъулин зикр намуданд, ки дар баробари Артиши миллӣ сохторҳои ҳифзи сарҳадӣ дар партави сиёсати фардосози Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, Ҷаноби Олӣ муҳтарам Эмомалӣ Раҳмон 28-уми майи соли 1994 дар сохтори мақомоти амнияти кишвар таъсис дода шуда, ин санаи таърихиро ҳамчун “Рӯзи сарҳадбонон” эълон гардид. Алъон иқтидори мудофиавии ҷузъу томҳои Қӯшунҳои сарҳадӣ аз лиҳози таъминот бо кадрҳои соҳибтахассуси ҳарбӣ ва техникаву таҷҳизоти ҳарбӣ хеле мустаҳкам гардидааст.

Президенти Ҷумҳурии Тоҷикистон Эмомалӣ Раҳмон дар Ҷаласаи Шӯрои олии иқтисодии Авруосиёи Иттиҳоди иқтисодии Авруосиё иштирок намуданд

29 май дар шаҳри Нур-Султони Ҷумҳурии Қазоқистон Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ҳайси меҳмони фахрӣ дар ҷаласаи Шӯрои олии иқтисодии Авруосиёи Иттиҳоди иқтисодии Авруосиё иштирок ва суханронӣ карданд.

Дар ҷаласа сарони давлатҳои аъзои иттиҳод — Арманистон, Беларус, Қазоқистон, Қирғизистон, Россия, инчунин Молдова чун давлати нозир ва Тоҷикистон ҳамчун меҳмони фахрӣ иштирок намуданд.

Зимни суханронии худ Президенти мамлакат муҳтарам Эмомалӣ Раҳмон пеш аз ҳама ба ҷониби Қазоқистон барои пазироии гарму самимӣ изҳори сипос намуданд.

Таъкид гардид, ки Тоҷикистон ва кишварҳои аъзои Иттиҳодро муносибатҳои зичи дӯстӣ ва ҳамкорӣ дар асоси дуҷониба ва ҳам дар ҷаҳорчуби ИДМ ва СААД ба ҳам мепайвандад. Рушди босамари муносибатҳои тиҷоратию иқтисодии кишварҳо исботи ин гуфтаҳост.

Президенти Ҷумҳурии Тоҷикистон Эмомалӣ Раҳмон бо нахустин Президенти Ҷумҳурии Қазоқистон Нурсултон Назарбоев мулоқот намуданд

28 май Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ дар Ҷумҳурии Қазоқистон дар шаҳри Нур-Султон бо нахустин Президенти Ҷумҳурии Қазоқистон Нурсултон Назарбоев мулоқот анҷом доданд.

Дар рафти вохӯрӣ, ки дар фазои дӯстона доир гардид, Пешвои миллат   муҳтарам Эмомалӣ Раҳмон бо таъкиди ҷараёни рушди бомуваффақияти муносибатҳои шарикии стратегии Тоҷикистон ва Қазоқистон дар ҳама арсаҳои ҳамкорӣ нақши хоссаи нахустин Президенти Қазоқистон Нурсултон Назарбоевро дар ин раванд махсус қайд карданд.

Зимнан Президенти мамлакат муҳтарам Эмомалӣ Раҳмон ибрози итминон намуданд, ки ҷонибҳо бо саъю талошҳои муштараки минбаъда ҳамкории гуногунҷанбаи Тоҷикистону Қазоқистонро ба зинаҳои нав хоҳанд баровард.