Наврӯз ҷашни ниёгони мост

Панҷшанбеи сеюми моҳи равон таҳти ин унвон Рӯзи ягонаи ахбори сиёсӣ дар беш аз 42 корхонаву Ҷамоати шаҳракҳо, муассисаву идораҳо ба вуқӯъ пайваст.

Дар баргузории ин чорабинии сиёсӣ тарғиботчиён аз мақомоти иҷроияи ҳокимияти давлатии вилояти Суғд Ҳабибулло Тоатов, устоди Донишгоҳи давлатии ҳуқуқ, бизнес ва сиёсати Тоҷикистон, Рустамҷон Юлдошев, устоди Донишгоҳи давлати Хуҷанд ба номи Бобоҷон Ғафуров тарғиботчиёни маҳаллӣ, кормандони масъули мақомоти иҷроияи ҳокимияти давлатии шаҳр иштирок намуда, доир ба иди асосии миллии мо – Наврӯзи байналмилал суханронӣ карданд. Тазаккур дода шуд, ки Наврӯзи ҷаҳонӣ, ки дар сарнавишти миллати мо ва тамоми меросбарони он нақши барҷаста дорад, ҳамчун падидаи нотакрори фарҳангӣ ва унсури тамаддуни миллии аҷдодиамон дар масири таърих тамоми инсониятро ба созандагиву офарандагӣ, барои эҷод ва бунёди тарҳи нави зиндагӣ ва ташаббусу иқдомҳои тоза ҳидоят намудааст.

Наврӯз дар гимназия

Ба ҳукми анъана даромадааст, ки Наврӯзи байналмилалӣ дар тамоми коргоҳу ташкилот қабл аз 21-уми март бо шаҳомати хосса таҷлил карда мешавад. Дар яке аз таълиимгоҳҳои бонуфузи шаҳр гимназияи ба номи Бобоҷон Ғафуров чорабинии фарҳангӣ бахшида ба ин ҷашни миллӣ баргузор гардид.

Овози гӯшнавозӣ карнай аз оғози чорабинӣ дарак дод. Меҳмонон аз мақомоти иҷроияи ҳокимияти шаҳр, шуъбаи маорифу фарҳанг ва муассисаҳои таълимӣ нахуст аз суманакпазиву нонҳои танӯрӣ ва баъдан хонҳои наврӯзии хонандагон дидан намуданд. Дар пайравии таъкидҳои ҳамешагии Пешвои муаззами миллат, муҳтарам Эмомалӣ Раҳмон имрӯз дар гимназия баҳри эҳёи чандин анъанаҳои миллӣ ва ҳунарҳои халқӣ намунаи корҳои хонандагон, аз ҷумла бофандагӣ, гулдӯзӣ, тайёр намудани хӯрокҳои миллӣ, хӯришҳои баҳорӣ ва бозиҳои миллӣ ба намоиш гузошта шуд.

Наврӯз дар коллеҷи тиббӣ

Тибқи нақшаи чорабини- ҳо дар колллеҷи тиббии шаҳр озмунҳои «Арӯси наврӯзӣ», иншонависӣ дар мавзӯи «Наврӯзи байналмилал», олимпиадаи фаннӣ ва монанди ин дар сатҳи баланди ташкилӣ ба вуқӯъ пайваста, мизи мудаввар дар мавзӯи «Таърих ва анъанаҳои наврӯзӣ» гузаронида шуд.

Ҳамзамон, таълимгоҳ бо овезаҳову шиорҳо ва рамзҳои наврӯзӣ оро дода шуда, намоиши марғуби театрикунонидашудаи «Наврӯзи диёри офтобӣ» барпо гардид.

Маҳфили наврӯзӣ

Зарнисор. Ба муносибати Наврӯзи байналмилал ва шастумин солгарди зодрӯзи шоири шинохта ва рӯзноманигори варзида Ҷӯра Юсуфӣ дар МТМУ №10 Ҷамоат маҳфили наврӯзӣ баргузор гардид. Дар наврӯзгоҳи муассиса омӯзгорон, хонандагон ва аҳли ҷамоат ҳозир гардида, ашъори дилангези шоир ва сурудҳои рӯҳнавози сарояндаи хушнаво Ҳасани Мирзо маҳфилро шукӯҳи хосса бахшид. Мавриди зикр аст, ки чорабинӣ дар сатҳи баланди ташкилӣ баргузор гардида, барои худшиносии миллии хонандагон ва арҷ гузоштан ба мероси фарҳангии ниёгон таъсири босазое мегузорад.