Кадбону ва арўси наврўзӣ

Дар ҷамоат, корхонаву муассиса ва идораҳо озмуни «Кадбонуи беҳтарин» гузаронида шуда, дар давраи шаҳрии он 13 нафар кадбону иштирок намуданд. Кадбонуи МТМУ №1 созовори ҷойи аввал гардида, ба озмуни вилоятӣ роҳхат гирифт.

Инчунин озмуни «Арўси наврўзӣ» бо иштироки занону духтарони ҷамоати шаҳракҳо, корхонаву муассисаҳо ба вуқўъ пайваста, ғолибон бо туҳфаҳои Раиси шаҳр сарфароз гардонида шуданд. Дар озмунҳои зикршуда ҳамчунин намоиши ҳунарҳои миллӣ ва маҳсули дастранҷи (атласу адрас, сўзанидўзӣ, қуроқдўзӣ, қолинбофӣ ва монанди ин) занону бонувони шаҳр ба маърази тамошо гузошта шуданд.

Тўйи хатнасури хайриявӣ

Дар Паёми навбатии худ Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъкид намуданд:«Дастгирии мақсадноки аҳолии ниёзманд тавассути расонидани кумаки суроғавӣ ва хизматҳои иҷтимоӣ яке аз самтҳои муҳими сиёсати давлат ба шумор меравад. Ҳамчунин, масъулонро зарур аст, ки барои беҳтар намудани шароити моддиву иҷтимоии оилаҳои камбизоат, ятимону маъюбон ва шахсони яккаву танҳо тадбирҳои мушаххасро роҳандозӣ намоянд».

Бо мақсади амалӣ намудани дастуру супоришҳои Пешвои миллат дар тарабхонаи “Соҳил” бо ташаббуси мақомоти ироияи ҳокимияти давлатии шаҳр ва дастгирии соҳибкорони шаҳр хатнасури дастаҷамъонаи 38 нафар писарбача аз оилаҳои ниёзманд баргузор гардид. Раиси шаҳри Гулистон Матлубахон Амонзода дар суханронии худ зикр намуд, ки ба ифтихори Наврўзи бузург – иди бошукўҳи аҷдодӣ, ки ҷашни ҷаҳонӣ гардидааст, мақомоти иҷроияи ҳокимияти давлатии шаҳр, дар ҳамкорӣ бо соҳибкорони саховатманди гулистонӣ, тасмим гирифтанд тўйи як гурўҳ писарбачаҳои дўстрўякро баргузор намоянд. Ин амал, дарвоқеъ яке аз виҷагиҳо ва фазилатҳои Наврўз, яъне дасти сахо дароз кардан ба ҳамдигар буда, ҳазорсолаҳост, ки миллати мо ин анъанаи ҷавонмардиро давом дода истодаанд.

Шаҳрамонро хуррам мегардонем

Дар раванди маъракаи камбудизоркунӣ дар маркази шаҳр аз тарафи шуъбаи ободонии КВД “ХМК” зиёда аз 2500 бех дарахтони сояафкан ва ороишӣ, 18000 кўчати гулҳои садбаргу гулбуттаҳо ва 20000 дигар гулҳои ороишии мавсимӣ шинонида шуд. Ба масоҳати 500 метри мураббаъ заминҳои сари роҳҳо тухми сабза корида шуд.

Дар шаҳракҳо 505 бех дарахти ардаҷ, 1268 бех дарахти санавбар, 159 бех дарахти арча, 115 бех дарахти туя, 50 бех ёси ҳиндӣ, 1190 бех сафеддор, инчунин 615 бех ниҳоли зардолу, 246 бех ниҳоли сиёҳолу, 395 бех ниҳоли шафтолу, 243 бех ниҳоли гелос, 462 бех ниҳоли олуча ва 8135 бех гули садбарг, 6800 бех карнайчагул, 100 бех гулкарам шинонида шуданд.

Машварати кории Пешвои миллат Эмомалӣ Раҳмон бо роҳбарону фаъолони вилояти Суғд

24 марти соли 2017 дар шаҳри Гулистон Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо роҳбарону фаъолони вилояти Суғд машварати корӣ доир намуданд.

Дар кори машварат вазъи иқтисодию иҷтимоии вилояти Суғд, рафти корҳои ободонию созандагӣ, кишту кори баҳорӣ ва кишти такрорӣ, ташкили корхонаҳои нави саноатӣ ва таъсиси ҷойҳои корӣ, бартараф кардани камбудию мушкилоти ҷойдошта мавриди таҳлилу баррасӣ қарор дода шуд.