ШАШ ГОЛИ МУҲСИН РУСТАМЗОДА БА ДАСТАИ "ГУЛИСТОН" ПИРӮЗӢ ОВАРД

18-уми июни соли 2022 дар доираи даври ҳаштуми Чемпионати Тоҷикистон оид ба футбол миёни дастаҳои  Лигаи якум дастаи "Гулистон"-и шаҳри Гулистон дастаи "Ваҳдат"-и шаҳри Ваҳдатро ба ҳузур пазируфт.

Қисми аввали дидорро бозигарони меҳмон бо муваффақият оғоз намуда, аз вазъиятҳои хуби голзанӣ истифода бурда 2 маротиба хати дарвозаи дастаи "Гулистон"-ро рахна намуданд. Пас аз ин гуна ранг гирифтани дидор бозигарони дастаи "Гулистон" ташаббусро ба даст гирифта то поёни қисми аввал 4 маротиба хати дарвозаи дастаи "Ваҳдат"-ро рахна намуда, тавонистанд ҳисоби бозиро бар нафъи худ 4-2 намоянд. Чаҳор туби дастаи "Гулистон"-ро дар қисми аввал беҳтарин нишонзани даста Муҳсин Рустамзода ба ҳадаф расонид.

Сарвари давлат Эмомалӣ Раҳмон бо лоиҳаи таъмиру навсозӣ ва мумфаршкунии роҳҳои марказии ноҳияи Дӯстӣ шинос шуданд

16 июн дар идомаи сафари корӣ дар ноҳияи Дӯстӣ Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамчунин бо лоиҳаи таъмиру навсозӣ ва мумфаршкунии роҳҳои марказии ноҳия шинос шуданд.

Корҳои таъмиру навсозии роҳҳои марказии ноҳияи Дӯстӣ соли 2019 дар асоси дастуру роҳнамоии Сарвари давлат муҳтарам Эмомалӣ Раҳмон аз рӯи меъёрҳои муосир оғоз гардида, бо руҳия ва ҳисси баланди миллӣ анҷом дода мешаванд.

Таъмиру навсозӣ ва мумфаршкунии роҳҳои марказии ноҳияи Дӯстӣ дар асоси лоиҳа дар маҷмӯъ 5 километр роҳ дар ду марҳила дар бар мегирад.

Президенти мамлакат Эмомалӣ Раҳмон дар ноҳияи Дӯстӣ ҶДММ «Ганҷи деҳа»-ро мавриди истифода қарор доданд

16 июн Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Дӯстии вилояти Хатлон Ҷамъияти дорои масъулияти маҳдуди «Ганҷи деҳа»-ро мавриди истифода қарор доданд.

Самти асосии фаъолияти корхонаи «Ганҷи деҳа» ба истеҳсоли равғани растанӣ ва қуттиҳои пластикӣ равона гардида, он дар заминаи татбиқи ҳадафи чоруми стратегии Ҳукумати мамлакат — саноатикунонии босуръати кишвар ва «Солҳои рушди саноат» бо саҳми соҳибкори ватанӣ Зиёдалӣ Ашӯрматов дар ҳамкорӣ бо шарикони рушд сохта ба истифода дода шудааст.

Биноҳои истеҳсолӣ ва дигар иншооти ёрирасони Ҷамъияти дорои масъулияти маҳдуди «Ганҷи деҳа» дар масоҳати 0,77 гектар қомат афрохта, бо ифтитоҳи корхона 20 нафар сокини маҳаллӣ, аз ҷумла занону духтарони хонашин соҳиби ҷойи кори доимӣ ва маоиши хуб гардиданд.

Пешвои миллат Эмомалӣ Раҳмон бо рафти кишти такрории шолӣ дар хоҷагии деҳқонии «Ашӯрбек-2012»-и ноҳияи Дӯстӣ шинос шуданд

16 июн Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар идомаи сафари корӣ ба вилояти Хатлон аз хоҷагии деҳқонии «Ашӯрбек-2012»-и ноҳияи Дӯстӣ дидан намуданд.

Сарвари давлат муҳтарам Эмомалӣ Раҳмон дар хоҷагии мазкур ба кишти такрории шолӣ оғоз бахшида, бо саҳмдорон ва дигар шолипарварони ноҳия суҳбати самимӣ анҷом доданд. Хоҷагии деҳқонии «Ашӯрбек-2012» дар деҳоти Деҳқонобод дорои 2,5 гектар замини корами обӣ мебошад ва дар як гектари он ҷуворимакка барои дон кишт намуда, дар боқимонда 1,5 гектар кишти шолӣ мегузаронанд. Масоҳати зикргардида барои кишти шолӣ пурра омода карда шудааст.

Ба Пешвои миллат муҳтарам Эмомалӣ Раҳмон иттилоъ дода шуд, ки қаблан хоҷагидорон дар ин масоҳат гандум кишт намуда, аз ҳар гектар 50 сентнер ҳосил ба даст овардаанд. Ҳосили ҷамъоваришуда пурра барои давраи зимистон захира карда шудааст. Навъи тухмии интихобгардидаи шолӣ барои кишт «Юбилей» мебошад ва он сифати хуб дошта, ба иқлими ноҳияи Дӯстӣ мувофиқ аст. Кишти шолӣ аз рӯи тартиби муайян ва ҷавобгӯ ба талабот дар 200 пал гузаронида шуда, нигоҳубини зироат бо риояи пураи агротехникаи кишт ба роҳ монда мешавад.