БАРГУЗОРИИ СЕМИНАРИ ОМӮЗИШӢ-ДАСТУРДИҲӢ ҶИҲАТИ ТАҚВИЯТИ КОРГУЗОРӢ

Дар толори хурди Мақомоти иҷроияи ҳокимияти давлатии шаҳри гулистон семинари омӯзишӣ дастурдиҳӣ ҷиҳати дуруст ба роҳ мондани коргузорӣ ва риояи “Қоидаҳои имлои забони тоҷикӣ ва Аломатҳои китобати забони тоҷикӣ”, ки бо Қарори Ҳукумати Ҷумҳурии Тоҷикистон аз 30 июни соли 2021, №268 қабул гардидааст бо иштироки роҳбарон ва коргузорони шуъбаву бахшҳо, ҷамоати шаҳракҳо ва дигар соҳаҳои хоҷагии халқи шаҳр баргузор гардид.

Дар семинар роҳбари дастгоҳи Раиси шаҳр Искандар Муродов, мудири бахши умумӣ Гулбаҳор Алимова ва мутахассиси татбиқи забони Мақомоти иҷроияи ҳокимияти давлатии шаҳр Фаридуншоҳ Абдуллоев иштирок ва суханронӣ намуданд.

Роҳбари дастгоҳи Раиси шаҳр Искандар Муродов ҳадафи баргузории семинарро ба самъи иштирокдорон расонида, таъкид намуд, ки раванди ҳуҷҷатгузорӣ дар шуъбаву бахшҳо, ҷамоати шаҳракҳо ва ҳамаи ташкилоту муассисаҳо тақвият бахшида шавад.

Густариши корҳои ободонӣ

Дар шаҳри Гулистон ҷиҳати ободу зебо гардонидани шаҳр ва тозаву озода нигоҳ доштани он ҳашари умумишаҳрӣ баргузор карда шуд. Дар ҳашари мазкур кормандони Мақомоти иҷроияи ҳокимияти давлатии шаҳр ва соҳаҳои маорифу тандурустӣ иштирок намуданд.

Дар рафти ҳашари умумишаҳрӣ дар маҳаллаҳои дохили шаҳр, шафати роҳи боло, назди биноҳои баландошёнаи истиқоматӣ ва дигар гӯшаву канори шаҳр корҳои тозаву озодагардонӣ ба роҳ монда шуд.  Ҳамчунин дар майдони назди Парчами давлатӣ дар шаҳр корҳои кабудизоркунӣ ба роҳ монда шуда, гулҳои ороишии мавсимӣ шинонида шуд. Кормандони Корхонаи воҳиди давлатии хоҷагии манзилию коммуналии шаҳр дар баровардани партовҳо ба ҳашарчиён кумак намуданд.

Чунин ҳашарҳо дар ҷамоати шаҳракҳо низ ба роҳ монда шуд. Ҳадаф аз баргузории ҳашарҳои дастаҷамъона баланд бардоштани маърифати шаҳрдорӣ, тозаву озода нигоҳ доштани муҳити зист, пешгирии ҳар гуна бемориҳои сироятӣ ва ба ин васила таъмини беҳдошти солимии ҷомеа мебошад.

Рӯзи дарҳои кушод дар дидбонгоҳи сарҳадии Ҷамоати шаҳраки Навгарзан

Ба муносибати таҷлили 29-умин солгарди таъсисёбии Рӯзи Қувваҳои Мусаллаҳи Ҷумҳурии Тоҷикистон дар дидбонгоҳи сарҳадии Ҷамоати Навгарзани шаҳри Гулистон Рӯзи дарҳои кушод баргузор гардид.

Раис ҷамоати шаҳрак табрикоти иҷрокунандаи вазифаи Раиси шаҳри Гулистон Раъно Ҳошимзодаро ба самъи иштирокдорон манзур намуд. Хонандагони синфҳои болоии муассисаи таҳсилоти миёнаи умумии №11-и ҷамоати шаҳрак аз вазъи будубош ва шароити хидмати сарбозон дидан намуданд. Миёни хонандагон ва сарбозон мусобиқаҳои варзишӣ баргузор гардид. Ба ғолибон Сипосномаҳо тақдим карда шуд. Хонандагон аз ошноӣ бо вазъи хидмати сарбозон таассуроти нек бардоштанд. Сипас, барои сарбозони дидбонгоҳи сарҳадии қисми ҳарбии 0216 дастархони идона ороста шуд.

МАШВАРАТИ КОРӢ БО ФАЪОЛОН ВА ҚАБУЛИ ШАҲРВАНДОН

Дар толори қасри фарҳанги Ҷамоати шаҳраки Адрасмони шаҳри Гулистон иҷрокунандаи вазифаи Раиси шаҳр Раъно Ҳошимзода дар аснои сафари корӣ  бо фаъолони шаҳрак вохӯрӣ доир намуд.

Дар вохӯрӣ фаъолони шаҳрак ва мудирони шуъбаву бахшҳои Мақомоти иҷроияи ҳокимияти давлатии шаҳр иштирок доштанд.

Зикр гардид, ки соли 2021 барои мардуми тоҷик соли таърихӣ буд, чун дар ин сол ҷашни фархундаи 30-солагии Истиқлолияти давлатии Ҷумҳурии Тоҷикистон  таҷлил карда шуд.

Ба муносибати ин ҷашн дар Ҷамоати шаҳраки Адрасмон бо дастгирии Мақомоти иҷроияи ҳокимияти давлатии шаҳр ва соҳибкорони маҳаллӣ бунёди иншооти ба нақша гирифта 33 адад буда, пурра амалӣ гардид.