Муборак бод! Шаҳри Гулистон - Беҳтарин шаҳри варзишӣ дар соли 2021

Имрӯз маросими ҷоизасупории Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар соҳаи варзиш баргузор гардид. Дар ин маросим шаҳри Гулистон бо ҷоизаи Беҳтарин шаҳри варзишӣ дар соли 2021 сарфароз гардид.

Лозим ба зикр аст, ки дар соли 2021 шаҳри Гулистон ба соҳаи варзиш таваҷҷуҳи хоса зоҳир намуд. Дастгириҳои пайвастаи роҳбарияти шаҳр буд, ки дастаи футболии шаҳр "Гулистон" дар чемпионати Тоҷикистон байни дастаҳои Лигаи дуюм ғолиби минтақаи Суғд ва ниҳоят қаҳрамони Тоҷикистон гардида, роҳхат ба Лигаи аввали футболи мамлакатро соҳиб гардид. Ҳамчунин, футболбозони шаҳр ғолиби ҷоми вилояти Суғд низ гардида буданд. Варзишгарони шаҳр низ дар соли сипаригардида ба дастовардҳои назарраси варзишӣ ноил гардиданд. Дар ин самт саҳми бахши кор бо ҷавонон ва варзиши шаҳр ва мактаби варзишии кӯдакону наврасони шаҳр низ назаррас аст.

Боздиди Раъно Ҳошимзода аз варзишгоҳи марказии шаҳри Гулистон

Имрӯз, 1 марти соли 2022 иҷрокунандаи вазифаи раиси шаҳри Гулистон Раъно Ҳошимзода аз варзишгоҳи марказии шаҳр боздид ба амал овард. Роҳбари шаҳр зимни шиносоӣ аз ҳолати кунунии варзишгоҳ ба масъулин баҳри вусъати корҳои ободониву созандагӣ, барқарорсозии инфрасохтори ҳудуди варзишгоҳ, сабзкории майдони асосӣ, шинонидани дарахтони ороишиву сояафкан, чароғонкунии ҳудуди варзишгоҳ дастуру супоришҳои мушаххас дод.

Гуфта шуд, ки дар заминаи дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон моро зарур аст, ки ба масъалаи таъмини шароити мусоид баҳри ҷалби бештари наврасону ҷавонон ба тарбияи ҷисмонӣ ва варзиш, тарғибу ташвиқ ва оммавигардонии варзиш, ташаккули тарзи ҳаёти солим таваҷҷуҳи хоса зоҳир намуда, аз тамоми имкониятҳо самаранок истифода намоем.

Раъно Ҳошимзода роҳбарияти муассисаи давлатии мактаби варзиширо вазифадор намуд, то бо ҷалби мутахассисони соҳа то ҷашни байналмилалии Наврӯз корҳои ободониву сабзкориро тақвият бахшида, баҳри баргузории мусобиқаҳои сатҳи шаҳрӣ, вилоятӣ ва ҷумҳуриявӣ шароити мусоид фароҳам оваранд.

Имрӯз маҷлиси Ҳукумати Ҷумҳурии Тоҷикистон баргузор шуд

28 феврал таҳти раёсати Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси Ҳукумати мамлакат муҳтарам Эмомалӣ Раҳмон маҷлиси Ҳукумати Ҷумҳурии Тоҷикистон баргузор гардид.

Дар кори маҷлис нахуст Дар бораи ҳисобот оид ба заминҳои мавҷуда, тақсимоти онҳо аз рӯи гурӯҳҳо, намудҳо ва заминистифодабарандагони  ҷумҳурӣ  ба  ҳолати  1  январи  соли 2022 раиси Кумитаи давлатии идораи замин ва геодезӣ Ориф Хоҷазода гузориш дод.

Таъкид гардид, ки дар ҷумҳурӣ дар истифодаи корхонаю ташкилотҳои кишоварзӣ 6 миллиону 953 ҳазору 866 гектар замин, аз он 682 ҳазору 828 гектар обӣ қарор дорад. Заминҳои таъйиноти кишоварзӣ дар муқоиса бо ҳисоботи солонаи замин ба ҳолати 1 январи соли 2021 майдони умумии 24 ҳазору 349 гектар, аз он 2 ҳазору 96 гектар обӣ кам шудааст. Заминҳои корами ҷумҳурӣ 205 гектар ва майдони корами обӣ 246 гектар кам шуда, дарахтони бисёрсола 1 ҳазору 218 гектар, аз он 889 гектар обӣ зиёд шудааст.

Машварати кории назди и.в Раиси шаҳр

28 феврали соли 2022 дар толори хурди Мақомоти иҷроияи ҳокимияти давлатии шаҳр машварати кории назди иҷрокунандаи вазифаи Раиси шаҳр бо роҳбарони шуъбаву бахшҳо ва ташкилоту корхонаҳо доир гардид.

Раъно Ҳошимзода иҷрокунандаи вазифаи Раиси шаҳр масъалаҳои иҷрои нақшаи андозу пардохтҳои давлатӣ, сари вақт таъмин намудани нақшаҳои истеҳсолӣ маҳсулотҳои саноатӣ, тақвияти корҳои ободонӣ, дар сатҳи зарурӣ ба роҳ мондани чорабиниҳои оммавию фарҳангӣ, пурзӯр намудани фаъолияти соҳаи иҷтимоӣ, омода намудани шаҳр ба қабули меҳмонони олиқадр ва корбари дар самти иҷрои нақшаи даъвати ҷавонписарон ба сафи Қувваҳои Мусаллаҳро мавриди баррасӣ қарор дод.

Ҷиҳати тақвияти корҳои ободонӣ ба масъулин таъкид гардид, ки ҷадвали вобастакунии масъулони Мақомоти иҷроияи ҳокимияти давлатии шаҳр бо фарогирии роҳбарони сохторҳо ва раисони маҳаллаҳо таҳия  ва барои тасдиқ пешниҳод карда шавад. Вобаста ба таъмини афзоиши ҳаҷми истеҳсоли маҳсулоти саноатӣ, иҷрои нақшаи андозу пардохтҳои давлатӣ дар назди масъулон супоришҳои мушаххас гузошта шуд.