АМАЛИ ХАЙРУ ЭҲСОН

Бахшида ба 30-юмин солгарди Истиқлолияти давлатии Ҷумҳурии Тоҷикистон аз ҷониби Мақомоти иҷроияи ҳокимияти давлатии шаҳри Гулистон собиқадорони меҳнат Ҳабиба Камолова ва Надеҷда Раҳматуллаевна аёдат карда шуданд.

Ба собиқадорон маводи хӯрокаи ниёзи аввал тақдим карда шуд. Собиқадорони меҳнат аз ин амал саршори шодӣ гардида, ба Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои хидмати содиқона ба халқу Ватан ва дастгирии ҳамешагии ниёзмандон изҳори самимии миннатдорӣ баён намуданд.

Аёдати собиқадорон дар остонаи ҷашнвораҳо ба анъанаи нек табдил ёфтааст. Дастгирии ниёзмандон амали хайру эҳсон мебошад. Мақомоти иҷроияи ҳокимияти давлатии шаҳр дар арафаи ҳамагуна ҷашнҳо собиқадорони меҳнатро ба аёдат фаро мегирад.

РОҲПАЙМОӢ БА ИСТИҚБОЛИ ИСТИҚЛОЛ

Бахшида ба таҷлили ҷашни бузурги миллӣ 30-юмин солгарди истиқлолияти давлатии Ҷумҳурии Тоҷикистон бегоҳирӯзии 7-уми сентябр дар шаҳри Гулистон роҳпаймоии ҷомеаи меҳнатии шаҳр доир гардид. Роҳпаймоӣ дар кӯчаи марказӣ ба сӯйи майдони “Тоҷикистон ба пеш!” сурат гирифт. Дар роҳпаймоӣ намояндагони соҳаҳои хоҷагии халқи шаҳр, корхонаву ташкилот, муассисаҳо, Ҷамоати шаҳракҳо бо  намоиши дастовардҳои меҳнатӣ ва дар даст шиору овезаҳо ба ифтихори ҷашни 30-солагии Истиқлолияти давлатии кишвар роҳпаймоӣ намуданд.

Чорабиниҳои идона бахшида ба таҷлили 30-юмин солгарди Истиқлолияти давлатии Ҷумҳурии Тоҷикистон дар майдони “Тоҷикистон ба пеш!” идома ёфтанд.

Дар ибтидо намояндаи Ҳукумати Ҷумҳурии Тоҷикистон, роҳбари гурӯҳи корӣ оид ба таҳия ва амалӣ кардани нақшаи корҳои ободонию бунёдкорӣ ба муносибати 30-солагии Истиқлолияти давлатии Ҷумҳурии Тоҷикистон, директори Агентии таъминоти амволи махсуси назди Ҳукумати Ҷумҳурии Тоҷикистон Савзаалӣ Назирзода ҳозиринро аз номи Ҳукумати Ҷумҳурии Тоҷикистон, муборакбод намуд.

ИСТИҚЛОЛИЯТ – ҶАВҲАРИ ҲАСТИИ МИЛЛАТ

Дар толори Мақомоти иҷроияи ҳокимияти давлатии шҳари Гулистон санаи 07.09.2021  ҷамъомади ботантана ба ифтихори таҷлили ҷашни бузурги миллӣ 30-солагии Истиқлолияти давлатии Ҷумҳурии Тоҷикистон бо иштироки намояндагони соҳаҳои хоҷагии халқи шаҳр, мақомоти қудратӣ, собиқадорони меҳнат, намояндагони ҳизбу ташкилотҳои ҷамъиятӣ ва ҷавонон баргузор гардид.

Ҷамъомади ботантана бо садо додани Суруди миллии Ҷумҳурии Тоҷикистон  ифтитоҳ ёфта, дар ибтидо намояндаи Ҳукумати Ҷумҳурии Тоҷикистон, роҳбари гурӯҳи корӣ оид ба таҳия ва амалӣ кардани нақшаи корҳои ободонию бунёдкорӣ ба муносибати 30-солагии Истиқлолияти давлатии Ҷумҳурии Тоҷикистон, муовини директори Агентии таъминоти амволи махсуси назди Ҳукумати Ҷумҳурии Тоҷикистон Муҳаммадӣ Абдусатторзода ҳозиринро аз номи Ҳукумати Ҷумҳурии Тоҷикистон, намояндаи Мақомоти иҷроияи ҳокимияти давлатии вилояти Суғд, директори Маркази “Тоҷикстандарт” дар вилоят Муҳаммадӣ Давлатов гулистониёнро аз номи Раиси вилояти Суғд, муовини аввали Раиси Маҷлиси миллии Маҷлиси Олии Ҷумҳурии Тоҷикистон Раҷаббой Аҳмадзода шодбош намуда, муборакбодиҳоро манзури ҳозирин намуданд.

ЧОРАБИНИИ МУДОФИАВӢ – ПАРАДИ ҲАРБӢ

Субҳи 7-уми сентябр дар асоси супориши Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳҳои Мусаллаҳи Ҷумҳурии Тоҷикистон, генерали артиш муҳтарам  Эмомалӣ  Раҳмон ва тибқи нақшаи тасдиқгардида бахшида ба 30-юмин солгарди Истиқлолияти давлатии Ҷумҳурии Тоҷикистон дар саросари кишвар, аз ҷумла дар шаҳри Гулистон чорабинии мудофиавӣ – паради ҳарбӣ бо иштироки  зиёда аз 1000 нафар аз ҳисоби кормандони Мақомоти иҷроияи ҳокимияти давлатии шаҳр, мақомоти ҳифзи ҳуқуқ, ҷомеаҳои меҳнатии Ҷамоати шаҳракҳо, корхонаву идораҳо, ташкилоту муассисаҳо  ва шаҳрвандони дар қайди эҳтиётӣ қарор доштаи шаҳри Гулистон баргузор гардид.

Чорабинии мудофиавӣ – паради ҳарбӣ бо садо додани Суруди миллӣ оғоз гардид. Раиси шаҳри Гулистон Бахтиёр Саидаҳмадзода дар назди сафоростагон суханронӣ карда, ҳозиринро бо ҷашни 30-солагии Истиқлолияти давлатии Ҷумҳурии Тоҷикистон табрику таҳният намуд. Зикр гардид, ки таҳти сарварии хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар барбобари Истиқлолияти давлатӣ ба ташкил ва ба вуҷуд овардани заминаи сиёсиву ҳуқуқии сохтори ҳарбии ҷумҳурӣ муваффақ шудем. Маҳз туфайли ғамхории пайвастаи Пешвои муаззами миллат, Сарфармондеҳи Олии Қувваҳои Мусаллаҳ имрӯз Артиши Миллии мо ба сипари боэътимоди муҳофизкунанда табдил ёфтааст.Фарзандони бо нангу номус ва содиқу ҷасури тоҷик дар ҳама давру замон марзу буми аҷдодиро ҳимоя карда, қаҳрамонӣ нишон додаанд. Корнамоии Шерак, Деваштич, Исмоили Сомонӣ, Восеъ ва Темурмалик раҳнамои зиндагии мост.