Президенти Ҷумҳурии Тоҷикистон Эмомалӣ Раҳмон дар ҷамъомади тантанавӣ ба ифтихори 30-солагии таъсиси Қувваҳои Мусаллаҳи Ҷумҳурии Тоҷикистон иштирок намуданд

23 феврал дар Кохи Борбад Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи мамлакат муҳтарам Эмомалӣ Раҳмон дар ҷамъомади тантанавӣ ба ифтихори 30-солагии таъсиси Қувваҳои Мусаллаҳи Ҷумҳурии Тоҷикистон иштирок ва суханронӣ карданд.

Президенти мамлакат муҳтарам Эмомалӣ Раҳмон нахуст тамоми хизматчиёни ҳарбии сохторҳои низомӣ ва мақомоти ҳифзи ҳуқуқ, инчунин собиқадорони хизмати ҳарбиро ба ифтихори рӯзи таъсиси Қувваҳои Мусаллаҳи Ҷумҳурии Тоҷикистон самимона табрику таҳният гуфтанд.

Сарвари давлат оид ба таърихи 30 соли дар шароити ниҳоят вазнину ҳассоси иқтисодӣ ва ҳарбиву сиёсии мамлакат таъсисёбии Қувваҳои мусаллаҳи мамлакат, аз имтиҳону озмоишҳои сахту сангин гузаштану ба сохтори муташаккилу боэътимод, неруи пурқудрати ҳимоятгари давлату халқи Тоҷикистон ва яке аз шоҳсутунҳои давлати соҳибистиқлоли Тоҷикистон табдил ёфтанаш андешаронӣ карданд.

Аёдати собиқадорон ва модарони фарзандгумкарда ба муносибати Рӯзи Қувваҳои Мусаллаҳ

Дар рӯзҳои иду айём хабаргириву ҳолпурсии ашхосе, ки барои ҷомеа хизмат намудаанд, ба аъанаи нек табдил ёфта, гувоҳи равшани он аст, ки мардуми мо суннатҳои некро ҳамеша пос медоранд.

Дар партави сиёсати инсонпарваронаи Пешвои муаззами миллат муҳтарам Эмомалӣ Раҳмон ба муносибати таҷлили 30-юмин солгарди таъсисёбии Рӯзи Қувваҳои Мусаллаҳи Ҷумҳурии Тоҷикистон Раиси шаҳри Гулистон Раъно Ҳошимзода собиқадорони  хизмати ҳарбӣ ва модарони фарзандгумкардаро аёдат намуд.

Дар вақти суҳбат  Раиси шаҳр таъкид намуд, ки меҳнати фидокоронаи пирони рӯзгор ҳамеша қадр шуда, фаъолияти бенуқсони онҳо мактаби бузург барои тарбияи насли ҷавон аст.

Раиси шаҳри Гулистон 30-юмин солгарди таъсисёбии Қувваҳои Мусаллаҳи Ҷумҳурии Тоҷикистонро ба собиқадорону модарони фарзандгумкарда ва аҳли оилаи онҳо табрик гуфта, барояшон маводҳои яквақтинаи ниёзи аввал тақдим намуд.

ҚУВВАҲОИ МУСАЛЛАҲИ КИШВАР ҲОМИИ МАРЗУ БУМИ ВАТАН - аёдати сарбозони қисми ҳарбии 45025-и Кумитаи Ҳолатҳои фавқулода ва мудофиаи граждании Ҷумҳурии Тоҷикистон дар вилояти Суғд

Имрӯз, 22.02.2023 бахшида ба 30-солагии таъсисёбии Қувваҳои Мусаллаҳи Ҷумҳурии Тоҷикистон бо сарбозони қисми ҳарбии 45025-и Кумитаи Ҳолатҳои фавқулода ва мудофиаи граждании Ҷумҳурии Тоҷикистон дар вилояти Суғд вохӯрӣ баргузор гардид.

Дар вохӯрии мазкур Раиси шаҳри Гулистон Раъно Ҳошимзода ва комиссари ҳарбии шаҳр Хайрулло Сатторзода иштирок ва суханронӣ намуданд.

Раиси шаҳри Гулистон Раъно Ҳошимзода сарбозон ва афсарони қисми ҳарбии 45025-и Кумитаи Ҳолатҳои фавқулода ва мудофиаи граждании Ҷумҳурии Тоҷикистон дар вилояти Суғдро бо фарорасии 30-юмин солгарди Қувваҳои Мусаллаҳи Тоҷикистон муборакбод намуд.

Дар вазъи тантанавӣ афсарон ва сарбозони фаъол бо Сипоснома қадрдонӣ карда шуданд.

Сипас, гузашти низомии афсарони қисми ҳарбӣ баргузор гардид.

ЭМОМАЛӢ РАҲМОН – БУНЁДГУЗОРИ ҚУВВАҲОИ МУСАЛЛАҲИ ҶУМҲУРИИ ТОҶИКИСТОН

Имрӯз, 22.02.2023 дар толори мактаби санъати маркази шаҳр Тибқи нақшаи кории Кумитаи кор бо ҷавонон ва варзиши назди Ҳукумати Ҷумҳурии Тоҷикистон, бахши кор бо ҷавонон ва варзиши шаҳр бахшида ба 30-солагии таъсисёбии Қувваҳои Мусаллаҳи Ҷумҳурии Тоҷикистон конференсияи илмӣ-амалӣ таҳти унвони “Эмомалӣ Раҳмон – бунёдгузори Қувваҳои мусаллаҳи Ҷумҳурии Тоҷикистон” бо иштироки ҷавонони муассисаҳои таълимии шаҳр ва коллеҷи тиббии шаҳр баргузор гардид.

Дар кори конференсия Аҳлиддин Абдураҳмонов, мудири бахши кор бо ҷавонон ва варзиши шаҳр, Фаридуншоҳ Абдуллоев мудири шуъбаи рушди иҷтимоӣ ва робита бо ҷомеаи дастгоҳи Раиси шаҳр, Парвиз Касирзода сардори шуъбаи даъвати Комиссариати ҳарбии шаҳр, Эмомалӣ Бобоев директори МД Маркази таҳсилоти иловагии шаҳр, Исмоил Саидов мудири бахши адабиёт ва камолшиносии Маркази илмии Камоли Хуҷандӣ иштирок ва суханронӣ намуданд.

Қувваҳои Мусаллаҳи Тоҷикистони соҳибистиқлол дар шароити ниҳоят мураккабу ҳассоси сиёсиву низомӣ ва иқтисодиву иҷтимоии таърихи мардуми тоҷик ва давлати тоҷикон таъсис дода шуданд.