Кист ғамхори Ватан, гар на ту бошиву на ман! - баргузории хониши сиёсӣ бо ҷавонони фаъоли шаҳри Гулистон

Дар толори муассисаи давлатии Маркази таҳсилоти иловагии шаҳри Гулистон бо иштироки таълимгирандагони маҳфилҳои амалкунандаи марказ хониши сиёсӣ баргузор гардид. Дар чорабини мудири бахши кор бо ҷавонон ва варзиши шаҳр Аҳлиддин Абдураҳмонов, мутахассиси татбиқи забони Мақомоти иҷроияи ҳокимияти давлатии шаҳр Фаридуншоҳ Абдуллоев ва директори Муассисаи давлатии Маркази таҳсилоти иловагии шаҳр Эмомалӣ Бобоев иштирок ва суханронӣ намуданд.

Зикр гардид, ки ба истифода додани муассисаи давлатии Маркази таҳсилоти иловагии шаҳри Гулистон бо иштироки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои таълимгирандагони муассисаҳои таълимии шаҳр имконияти васеи омӯзиши касбу ҳунар ва тақвияти донишҳои замонавиро фароҳам овард.

БАРГУЗОРИИ ҲАМОИШИ "АРҶГУЗОРӢ БА МОДАР"

Имрӯз, 2 март бо ибтикори мақомоти иҷроияи ҳокимияти давлатии шаҳри Гулистон дар майдони маҷмааи "Дасти дуои Модар" бахшида ба Рӯзи Модар ҳамоиши идона доир гардид. Ҳамоиш бо гузоштани гулчанбар дар назди муҷассамаи "Дасти дуои Модар" оғоз ёфт.

Дар ҳамоиш модарону бонувони касбу кори гуногун, собиқадорони меҳнат, наврасону ҷавонони шаҳри Гулистон ширкат намуданд.

Мудири бахши кор бо занон ва оилаи мақомоти иҷроияи ҳокимияти давлатии шаҳри Гулистон иштирокдорони ҳамоишро бахшида ба Рӯзи Модар таҳният гуфта, барояшон сиҳатмандии комил ва рӯзгори осуда таманно намуд.

Муборак бод! Шаҳри Гулистон - Беҳтарин шаҳри варзишӣ дар соли 2021

Имрӯз маросими ҷоизасупории Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар соҳаи варзиш баргузор гардид. Дар ин маросим шаҳри Гулистон бо ҷоизаи Беҳтарин шаҳри варзишӣ дар соли 2021 сарфароз гардид.

Лозим ба зикр аст, ки дар соли 2021 шаҳри Гулистон ба соҳаи варзиш таваҷҷуҳи хоса зоҳир намуд. Дастгириҳои пайвастаи роҳбарияти шаҳр буд, ки дастаи футболии шаҳр "Гулистон" дар чемпионати Тоҷикистон байни дастаҳои Лигаи дуюм ғолиби минтақаи Суғд ва ниҳоят қаҳрамони Тоҷикистон гардида, роҳхат ба Лигаи аввали футболи мамлакатро соҳиб гардид. Ҳамчунин, футболбозони шаҳр ғолиби ҷоми вилояти Суғд низ гардида буданд. Варзишгарони шаҳр низ дар соли сипаригардида ба дастовардҳои назарраси варзишӣ ноил гардиданд. Дар ин самт саҳми бахши кор бо ҷавонон ва варзиши шаҳр ва мактаби варзишии кӯдакону наврасони шаҳр низ назаррас аст.

Боздиди Раъно Ҳошимзода аз варзишгоҳи марказии шаҳри Гулистон

Имрӯз, 1 марти соли 2022 иҷрокунандаи вазифаи раиси шаҳри Гулистон Раъно Ҳошимзода аз варзишгоҳи марказии шаҳр боздид ба амал овард. Роҳбари шаҳр зимни шиносоӣ аз ҳолати кунунии варзишгоҳ ба масъулин баҳри вусъати корҳои ободониву созандагӣ, барқарорсозии инфрасохтори ҳудуди варзишгоҳ, сабзкории майдони асосӣ, шинонидани дарахтони ороишиву сояафкан, чароғонкунии ҳудуди варзишгоҳ дастуру супоришҳои мушаххас дод.

Гуфта шуд, ки дар заминаи дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон моро зарур аст, ки ба масъалаи таъмини шароити мусоид баҳри ҷалби бештари наврасону ҷавонон ба тарбияи ҷисмонӣ ва варзиш, тарғибу ташвиқ ва оммавигардонии варзиш, ташаккули тарзи ҳаёти солим таваҷҷуҳи хоса зоҳир намуда, аз тамоми имкониятҳо самаранок истифода намоем.

Раъно Ҳошимзода роҳбарияти муассисаи давлатии мактаби варзиширо вазифадор намуд, то бо ҷалби мутахассисони соҳа то ҷашни байналмилалии Наврӯз корҳои ободониву сабзкориро тақвият бахшида, баҳри баргузории мусобиқаҳои сатҳи шаҳрӣ, вилоятӣ ва ҷумҳуриявӣ шароити мусоид фароҳам оваранд.