Президенти мамлакат Эмомалӣ Раҳмон Маркази саломатии деҳоти «Зарзамин»-ро дар ноҳияи Бобоҷон Ғафуров ифтитоҳ намуданд

7 октябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Бобоҷон Ғафуров бинои навбунёди Маркази саломатии деҳоти «Зарзамин»-ро мавриди баҳрабардорӣ қарор доданд.

Иншооти мазкур бахшида ба 30-солагии Истиқлолияти давлатии Ҷумҳурии Тоҷикистон бо мақсади ҳифзи саломатии мардум бунёд гардида, дар он шароити зарурии хизматрасонии тиббӣ муҳайё карда шудааст.

Қаблан Маркази саломатии деҳоти “Зарзамин” дар бинои собиқ ҷамоати деҳот фаъолият дошт ва бештар аз 35 нафар корманди соҳаи тандурустӣ ба аҳолӣ хизмат мерасониданд.

Зимни шиносоии Президенти мамлакат муҳтарам Эмомалӣ Раҳмон иттилоъ дода шуд, ки бинои нави Маркази саломатии деҳоти “Зарзамин” бо харҷи 2 миллиону 278 ҳазор сомонӣ аз ҷониби Мақомоти иҷроияи ҳокимияти давлатии ноҳияи Бобоҷон Ғафуров бунёд гардида, атрофи иншооти ҷашнӣ сабзу хуррам ва ободу зебо гардонида шудааст. Бино аз 2 ошёна иборат буда, дар ошёнаи якум ҳуҷраҳои бақайдгирӣ, рентген, табобати дандон, таҳлилгоҳ, ултрасадо ва дар ошёнаи дуюм маъмурият, маҷлисгоҳ, ҳуҷраҳои иммунизатсия, гузаронидани сӯзандорӯ ва ҳуҷраи хатна ҷой дода шудаанд.

Сарвари давлат Эмомалӣ Раҳмон Муассисаи таълимии хусусии «Ворисони илм»-ро дар шаҳри Бӯстон ифтитоҳ намуданд

7 октябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари корӣ ба шаҳру ноҳияҳои вилояти Суғд дар шаҳри Бӯстон бинои муассисаи таълимии хусусии «Ворисони илм»-ро мавриди баҳрабардорӣ қарор доданд.

Мактаби хусусии “Ворисони илм” дар доираи сиёсати маорифпарваронаи Президенти мамлакат муҳтарам Эмомалӣ Раҳмон баҳри сазовор истиқбол намудани ҷашни 30-солагии Истиқлолияти давлатӣ бо ташаббуси оилаи Рауповҳо бо харҷи беш аз 5 миллион сомонӣ бунёд гардидааст.

Бинои мактаб аз се ошёна иборат буда, дар он 18 адад синфхона бо 460 ҷойи нишаст ва дигар ҳуҷраҳои корӣ ҷой дода шудаанд. Муассисаи таълимӣ дорои маркази гармидиҳӣ буда, бо тамоми шароити муосири таълим сохта шудааст.

Пешвои миллат Эмомалӣ Раҳмон дар шаҳри Бӯстон корхонаи истеҳсоли шиферҳои асбестиро мавриди истифода қарор доданд

Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар оғози сафари корӣ ба шаҳри Бӯстон корхонаи истеҳсоли шиферҳои асбестии Ҷамъияти дорои масъулияти маҳдуди “Ганҷофар”-ро ифтитоҳ бахшида, иқдоми соҳибкоронро дар таъсиси корхонаҳои саноатӣ ва саҳмгузорӣ дар татбиқи ҳадафи чоруми стратегӣ — саноатикунонии босуръати кишвар муҳиму шоиста арзёбӣ намуданд.

Корхонаи нав бо иқдоми соҳибкори ватанӣ Зариф Самадов дар минтақаи саноатии шаҳри Бӯстон бо иқтидори истеҳсоли 500 дона шифери асбестӣ дар як шабонарӯз бунёд гардида, дар таъмини бозори дохилӣ бо ин маҳсулоти ватании сохтмонӣ тадбири муҳим аст.

Ба Сарвари давлат муҳтарам Эмомалӣ Раҳмон иттилоъ доданд, ки корхона дар масоҳати 1,16 гектар дар муҳлати як сол бо вориду васлу насби таҷҳизоти технологӣ аз Ҷумҳурии Мардумии Чин ва харҷи беш аз 5 миллион сомонӣ сармояи дохилӣ дар асоси лоиҳа сохта шудааст.

Сарвари давлат Эмомалӣ Раҳмон бинои нави аэровокзали Фурудгоҳи байналмилалии Хуҷандро расман ба истифода доданд

Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бинои нави аэровокзали Фурудгоҳи байналмилалии Хуҷандро расман ба истифода доданд.

Бояд гуфт, ки баҳри иҷрои дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон дар Фурудгоҳи байналмилалии Хуҷанд ба ифтихори истиқболи сазовори ҷашни бузурги миллӣ — 30 солагии Истиқлолияти давлатӣ корҳои бунёдкорӣ, созандагию ободонӣ вусъат ёфта, дар асоси нақшаҳои наву лоиҳаҳои замонавӣ инфрасохтори фурудгоҳ ба стандартҳои ҷаҳонӣ мутобиқ карда мешавад.

Ҷиҳати баланд бардоштани сатҳу сифати хизматрасониҳо ба мусофирон, таъмини сатҳи баланди бехатарии авиатсионӣ, бехатарии парвозҳо ва мутобиқ намудани инфрасохтори фурудгоҳ ба талаботу стандартҳои байналмилалӣ бо дастгирии Ҳукумати Ҷумҳурии Тоҷикистон лоиҳаи “Таҷдид ва муҷаҳҳазгардонии техникии бинои аэровокзали Фурудгоҳи байналмилалии Хуҷанд” дар солҳои 2016-2021 амалӣ карда шуда, марҳилаи аввал-толори хизматрасонии пешазпарвозӣ ва қабули мусофирони бинои нави аэровокзал бо арзиши лоиҳавии зиёда аз 220 миллион сомонӣ аз ҳисоби воситаҳои молиявии фурудгоҳ бунёду муҷаҳҳаз карда шудааст.