МОДАР ФАРИШТА БУД

Санаи 4 марти соли 2026 дар доираи нақша чорабинии Бахши кор бо занон ва оилаи МИҲД-и шаҳри Гулистон бахшида ба Рӯзи модар дар толори Мактаби санъат конфронс дар мавзӯи “Модар фаришта буд” баргузор гардид.
Ҳамоиши бонувонро бо сухани муқаддимавӣ муовини Раиси шаҳр Муслимахон Ҷамолиён ҳусни оғоз бахшида, зикр намуд, ки  дастгирию ғамхорӣ ва тадбирҳои созандаи баланд бардоштани мақоми занонро дар ҷомеа аз ҷумлаи самтҳои афзалиятноки фаъолияти Ҳукумати Ҷумҳурии Тоҷикистон ба вижа Пешвои миллат муҳтарам Эмомалӣ Раҳмон мебошад.
Мудири Бахши сабти асноди ҳолати шаҳрвандӣ Фарангис Ғаффорзода дар кори конфронс бо маърӯза баромад намуда, зикр дошт, ки яке аз шахсиятҳои барҷастаи илми ҷаҳонӣ Алберт Эйнштейн гуфтааст, ки танҳо муҳаббати модар ба фарзандаш муҳаббати ҳақиқӣ ва беғараз мебошад. Ҳамин аст, ки бузургони гузашта ҷойгоҳи маънавии биҳиштро дар зери қадамҳои модарон донистаанд, яъне эҳтироми модар ва хизмат ба ӯ роҳ ба сӯи хушбахтӣ ва биҳишт аст.

МАҲФИЛИ ИДОНА

Дар арафаи ҷашни фархундаи Рӯзи Модар, ки дар кишвари соҳибистиқлоли мо бо шукӯҳу шаҳомати хос таҷлил мегардад, дар шаҳри Гулистон силсила чорабиниҳои идона идома доранд. Яке аз чунин маҳфилҳои гарму самимӣ дар бинои адлияи шаҳр бо иштироки занону бонувони фаъол, собиқадорони меҳнат ва ҷавонон баргузор гардид.
Чорабинӣ бо мақсади гиромидошти мақому манзалати ҷойгоҳи зан дар ҷомеа, арҷгузорӣ ба заҳмату фидокориҳои модарон ва баланд бардоштани эҳтиром нисбат ба тарбиятгарони насли ояндасоз фарогир буд.

МАЪРАКАИ НИҲОЛШИНОНӢ

Дар доираи Ҳаракати ҷумҳуриявии ниҳолшинонӣ дар шаҳри Гулистон маъракаи ниҳолшинонӣ идома ёфта, дар Боғи фарҳангу фароғатии “Темурмалик” ниҳолони ҳамешасабз шинонида шуд. Дар маъракаи ниҳолшинонӣ Раиси шаҳри Гулистон Илҳом Пӯлотзода иштирок намуда, зикр дошт, ки бо истифода аз боду ҳавои мусоид нақшаи ниҳолшинонӣ бояд вусъат дода шавад. Ин тадбири муҳими экологӣ асосан бо ташкили ҳашарҳои дастҷамъона дар назар аст, ки соли ҷорӣ дар кӯчаю хиёбонҳо ва мавзеъҳои алоҳида беш аз 8 ҳазор бех ниҳолони ҳамешасабзу ороишӣ шинонида мешаванд.

Маъракаи ниҳолшинонӣ дар маркази шаҳр ва Ҷамоати шаҳракҳо идома дорад. Ин иқдом дар доираи «Барномаи давлатии кабудизоркунии Ҷумҳурии Тоҷикистон барои давраи то соли 2040» роҳандозӣ хоҳад шуд.

БАРРАСИИ МУРОҶИАТИ ШАҲРВАНДОН

28-уми феврали соли 2026 дар Мақомоти иҷроияи ҳокимияти давлатии шаҳр қабули навбатии шаҳрвандон аз ҷониби Раиси шаҳр Илҳом Пӯлотзода баргузор гардид.

Зимни қабул шаҳрвандон бо масъалаҳои гуногуни иҷтимоӣ ба шаҳрдор муроҷиат намуданд. Аз ҷумла, сокинон вобаста ба ҷудо намудани қитъаи замин, ба расмият даровардани ҳуҷҷатҳои ҳуқуқи истифодаи замин ва манзили истиқоматӣ, ҳалли баҳсҳои марбут ба моликияти шахсӣ ва амсоли инҳо суолҳо дода шуд.