Ҷамъбасти машқҳои муштараки амалиётӣ-стратегӣ бо Қӯшунҳои гарнизони Суғд

Дар машқгоҳи «Чоруқ-Дарон»-и гарнизони Суғд марҳилаи ниҳоии машқҳои муштараки амалиётӣ-стратегӣ бо ҷалби қӯшунҳои гарнизони Суғд ҷамъбаст гардид.

Машқҳои мазкур дар доираи иҷрои дастуру супоришҳои Сарфармондеҳи Олии Қувваҳои Мусаллаҳи Ҷумҳурии Тоҷикистон, генерали артиш муҳтарам Эмомалӣ Раҳмон оид ба таҳкими иқтидори мудофиавии давлат ва таъмини ҳифзи боэътимоди марзу буми кишвар аз ҷониби Вазорати мудофиаи Ҷумҳурии Тоҷикистон ташкил ва баргузор карда шуданд.

Бо мақсади назорат ва баҳогузорӣ ба сатҳи омодагии ҷангӣ, маҳорату малакаи ҳайати шахсӣ ва ҳамоҳангии фаъолияти ҷузъу томҳои сохторҳои қудратӣ дар марҳилаи ниҳоии машқҳо вазири мудофиаи Ҷумҳурии Тоҷикистон, генерал-полковник Собирзода Эмомалӣ, намояндаи Шӯрои амнияти Ҷумҳурии Тоҷикистон, Раиси вилояти Суғд Раҷаб Аҳмадзода ва намояндагони сохторҳои қудратӣ ва мақомоти ҳифзи ҳуқуқи вилоят дар машқгоҳ ширкат доштанд.

Ифтитоҳи майдончаи варзишӣ дар шаҳраки Адрасмон

Дар деҳаи Гулдараи Ҷамоати шаҳраки Адрасмони шаҳри Гулистон бо иштироки Раиси вилояти Суғд Раҷаб Аҳмадзода майдончаи варзишӣ мавриди истифода қарор гирифт.

Дар маросими ифтитоҳи иншооти ҷашнӣ Раиси вилоят ба соҳибкор Санъатҷон Баротов барои саҳмгузорӣ дар корҳои ободониву созандагӣ изҳори сипос намуда, таъкид кард, ки ободии Ватан аз ободии хона, кӯча, маҳалла ва шаҳру деҳот оғоз меёбад ва ҳар як шаҳрванд бояд дар пешрафти Тоҷикистони соҳибистиқлол саҳми худро гузорад.

Таъкид гардид, ки бунёди чунин иншооти варзишӣ барои фароҳам овардани шароити мусоид барои наврасону ҷавонон ва тарғиби тарзи ҳаёти солим мусоидат мекунад.

Шиносоӣ бо рафти корҳои ободонӣ дар шаҳраки Адрасмон

Дар Ҷамоати шаҳраки Адрасмони шаҳри Гулистон бо саҳми сокинон ва соҳибкорони маҳаллӣ корҳои ободониву созандагӣ идома доранд.

Дар доираи тадбирҳои омодагӣ ба ҷашни 35-солагии Истиқлоли давлатии Ҷумҳурии Тоҷикистон бо иштироки Раиси вилояти Суғд Раҷаб Аҳмадзода мумфаршкунии яке аз роҳҳои ҷамоат оғоз гардид.

Роҳи мазкур бо дарозии 1800 метр ва паҳноии 6 метр бо маблағгузории соҳибкорону сокинон мумфарш карда мешавад.

Боздиди Раиси вилоят Раҷаб Аҳмадзода аз ҶСК «Комбинати маъдантозакунии Адрасмон»

Дар доираи корҳои созандагию ободонӣ ба истиқболи 35-солагии Истиқлоли давлатии Ҷумҳурии Тоҷикистон ва татбиқи ҳадафи чоруми стратегӣ-саноатикунонии босуръати кишвар дар шаҳри Гулистон корҳои барқарорсозӣ ва бунёди корхонаҳои нави истеҳсолӣ бо маром идома доранд.

Раиси вилояти Суғд Раҷаб Аҳмадзода зимни сафари корӣ дар Ҷамоати шаҳраки Адрасмони шаҳри Гулистон бо ҷараёни корҳои навсозӣ дар ҶСК «Комбинати маъдантозакунии Адрасмон» шинос гардид.

Иттилоъ дода шуд, ки комбинати мазкур аз соли 2013 инҷониб фаъолият надошт. Бо дастгирии Ҳукумати Ҷумҳурии Тоҷикистон имрӯз корҳои азнавсозӣ, насбу васли таҷҳизоти муосир ва омодасозии истеҳсолот дар ин корхонаи азими саноатӣ идома дошта, он то ҷашни 35-солагии Истиқлоли давлатӣ ба истифода дода мешавад.