НАМОИШ-ФУРӮШИ МАҲСУЛОТИ САНОАТӢ, ҲУНАРҲОИ МАРДУМӢ, ТАОМҲОИ МИЛЛИИ ШАҲРИ ГУЛИСТОН ДАР ШАҲРИ ДУШАНБЕ

Санаи 5-июли соли 2026 дар Боғи фарҳангию фароғатии «Ирам»-и шаҳри Душанбе рӯзҳои фарҳангии шаҳрҳои Гулистон, Бӯстон ва Истиқлоли вилояти Суғд бо шукуҳу шаҳомати хоса баргузор гардида, маҳсулоти кишоварзию саноатӣ, ҳунарҳои мардумӣ, таомҳои миллӣ ва барномаи рангини фарҳангиву адабӣ пешкаши сокинону меҳмонони пойтахт гардонида шуд.

Дар чорабинии мазкур муовини якуми Раиси шаҳри Душанбе - Шарифӣ Бахтиёр Маҳмудзода, Раиси ноҳияи Исмоили Сомонӣ - Қодирзода Руслан Раҷаб, Раиси шаҳри Гулистон - Илҳом Пӯлодзода, Раиси шаҳри Бӯстон - Нуруллозода Фирӯза, Раиси шаҳри Истиқлол - Маҳмудзода Қаюмҷон ва дигар меҳмонону масъулин иштирок намуданд.

Зимни боздид меҳмонон аз намоиши маҳсулоти саноатӣ, маҳсули дасти ҳунармандони мардумӣ, таомҳои миллӣ ва дастовардҳои иҷтимоиву иқтисодии шаҳри Гулистон шинос гардида, ба сатҳу сифати маҳсулоти пешниҳодшуда баҳои баланд доданд.

Баргузории аксияи "Тозагии соҳил"

Имрӯз, 04.07.2026 тибқи нақшаи кории мақомоти иҷроияи ҳокимияти давлатии шаҳр ва дастуру супоришҳои Раиси шаҳр Илҳом Пӯлотзода аз ҷониби масъулини бахши ҳифзи муҳити зисти шаҳр дар соҳили "Баҳри тоҷик" аксияи "Тозагии соҳил" бо мақсади тозаву озода намудани соҳили баҳр, ки мавзеи истироҳативу фароғатӣ аст ва ҳамарӯза меҳмонон аз дохил ва хориҷи кишвар барои истироҳат ташриф меоранд баргузор гардид.

Дар рафти баргузории аксияи мазкур кормандони соҳаҳои гуногун фаъолона иштирок карда, соҳили баҳр аз партовҳо тозаву озода карда шуд.

Раиси шаҳри Гулистон аз рафти корҳои ободониву рушди инфрасохтори шаҳр боздид ба амал овард

Имрӯз 2 юми июли соли равон, Раиси шаҳри Гулистон Илҳом Пӯлотзода бо мақсади шиносоӣ аз ҷараёни корҳои ободонӣ, беҳтарсозии инфрасохтори шаҳр ва омодагӣ ба таҷлили ҷашни 35-солагии Истиқлоли давлатии Ҷумҳурии Тоҷикистон аз як қатор иншооту мавзеъҳои муҳими шаҳр боздид ба амал овард.

Зимни боздид Раиси шаҳр аз вазъи як қатор қитъаҳои шаҳр, иншооти хизматрасонӣ ва мавзеъҳои сайёҳӣ дидан намуда, бо масъулини соҳа оид ба вусъат бахшидани корҳои созандагиву ободонӣ, таъмини тозагӣ, кабудизоркунӣ ва фароҳам овардани шароити мусоид барои сокинону меҳмонон сӯҳбат анҷом дод.

Баргузории вохӯрии вакили Маҷлиси вакилони халқи вилояти Суғд, Раиси шаҳри Гулистон Илҳом Пӯлотзода бо интихобкунандагон дар Ҷамоати шаҳраки Сирдарё

Санаи 01.07.2026 соати 14:00 дар маҷлисгоҳи ҷамоати шаҳраки Сирдарёи шаҳри Гулистон вохӯрии вакили халқи вилояти Суғд Илҳом Пӯлотзода бо интихобкунандагон доир гардид.

Дар чорабинии мазкур Пӯлотзода Илҳом - Раиси шаҳри Гулистон дар доираи масъалаҳои амалигардонии қарорҳои Ҳукумати Ҷумҳурии Тоҷикистон аз 30 декабри соли 2021, №567 " Дар бораи Барномаи миллии рушди иҷтимоии ҷавонон дар Ҷумҳурии Тоҷикистон барои солҳои 2022- 2026" ва аз 31 декабри соли 2020, №702 " Дар бораи Барномаи тайёр намудани кадрҳои тиббӣ барои даври то соли 2030", пешгирии ҷалби шаҳрвандон ба гурӯҳҳои ифротӣ, таълимоти ғайриқонунии динӣ, истифодаи дурусти шабакаҳои иҷтимоӣ, пешгирии ҷавонон дар самти даст задани онҳо ба маводҳои психотронӣ, иштироки онҳо дар расму оинҳои динӣ, тақлидкорӣ ба либосҳои бегона ва шарҳи дастовардҳои 35 соли Истиқлоли давлатии Ҷумҳурии Тоҷикистон сухан ронда, ҳозиринро барои иҷрои амалҳои хайру савоб аз қабили тозагиву ободкорӣ, дастгирии беморон, аёдати калонсолон, дуруст тарбия кардани насли ҷавон даъват намуд.