ПАЁМИ ШОДБОШИИ РАИСИ ШАҲРИ ГУЛИСТОН ИЛҲОМ ПӮЛОТЗОДА БА ИФТИХОРИ РӮЗИ МОДАР

Модарон ва хоҳарони азиз!
Фарорасии фасли зебои сол – баҳори оламафрӯз ва ҷашни модаронро ба ҳамаи Шумо модарону хоҳарони мушфиқ табрик гуфта, бароятон саломатӣ ва саодати ҳамешагӣ орзу менамоям.
Зан-Модар баҳор аст. Маҳз, ба хотири хислатҳои ҳамидааш ӯро  Модар номидаанд, зеро гармидиҳандаву тасаллидиҳанда, наҷотбахшу  дармондиҳандаи мост.
Модарону хоҳарони гиромӣ!
Шумо пайвандгари наслҳову замонҳои имрӯзу фардои ҷомеа ва ҳусни зеботарин сафҳаи китоби зиндагӣ ҳастед. Дар раванди нави таърихиву сиёсии Тоҷикистон занон мақому манзалати худро шинохта, фаъолияти пурсамар ва дастовардҳои тоза фазои ҷомеаи моро таровати хоса мебахшанд.

ЗАН ОЛИҲАИ БЕҲТАРИН

Чунин ном дошт озмуне, ки бо мақсади тарғиби арзишҳои миллӣ, баланд бардоштани мақоми Зан – модар, омӯзгор, роҳбар, рушди қобилиятҳои эҷодӣ ва маънавии онҳо баргузор гардид.
Ин чорабинӣ дар байни бонувони корхонаю муассисаҳои таълимӣ дар фароғатгоҳи “Манижа” доир шуд.
Ҳадаф ва вазифаҳои озмун муайян намудани беҳтарин омӯзгор, роҳбарзани фаъолу эҷодкор, тақвияти нақши зан дар ҷомеа, рушди фарҳанги суханварӣ, зебоипарастӣ ва ҳунарҳои миллӣ буд.

МОДАР ФАРИШТА БУД

Санаи 4 марти соли 2026 дар доираи нақша чорабинии Бахши кор бо занон ва оилаи МИҲД-и шаҳри Гулистон бахшида ба Рӯзи модар дар толори Мактаби санъат конфронс дар мавзӯи “Модар фаришта буд” баргузор гардид.
Ҳамоиши бонувонро бо сухани муқаддимавӣ муовини Раиси шаҳр Муслимахон Ҷамолиён ҳусни оғоз бахшида, зикр намуд, ки  дастгирию ғамхорӣ ва тадбирҳои созандаи баланд бардоштани мақоми занонро дар ҷомеа аз ҷумлаи самтҳои афзалиятноки фаъолияти Ҳукумати Ҷумҳурии Тоҷикистон ба вижа Пешвои миллат муҳтарам Эмомалӣ Раҳмон мебошад.
Мудири Бахши сабти асноди ҳолати шаҳрвандӣ Фарангис Ғаффорзода дар кори конфронс бо маърӯза баромад намуда, зикр дошт, ки яке аз шахсиятҳои барҷастаи илми ҷаҳонӣ Алберт Эйнштейн гуфтааст, ки танҳо муҳаббати модар ба фарзандаш муҳаббати ҳақиқӣ ва беғараз мебошад. Ҳамин аст, ки бузургони гузашта ҷойгоҳи маънавии биҳиштро дар зери қадамҳои модарон донистаанд, яъне эҳтироми модар ва хизмат ба ӯ роҳ ба сӯи хушбахтӣ ва биҳишт аст.

МАҲФИЛИ ИДОНА

Дар арафаи ҷашни фархундаи Рӯзи Модар, ки дар кишвари соҳибистиқлоли мо бо шукӯҳу шаҳомати хос таҷлил мегардад, дар шаҳри Гулистон силсила чорабиниҳои идона идома доранд. Яке аз чунин маҳфилҳои гарму самимӣ дар бинои адлияи шаҳр бо иштироки занону бонувони фаъол, собиқадорони меҳнат ва ҷавонон баргузор гардид.
Чорабинӣ бо мақсади гиромидошти мақому манзалати ҷойгоҳи зан дар ҷомеа, арҷгузорӣ ба заҳмату фидокориҳои модарон ва баланд бардоштани эҳтиром нисбат ба тарбиятгарони насли ояндасоз фарогир буд.