30 июл - рӯзи кормандон хадамоти оташнишонӣ

Санаи 29 июл Раиси шаҳри Гулистон Илҳом Пӯлотзода кормандони Қисми мустақили 37 - уми ҳарбикунонидашудаи Хадамоти давлатии оташнишонӣ оид ба муҳофизати шаҳрро, ки фаъолияти пурсамари хизматӣ доранд ба муносибати иди касбӣ таҳният гуфта, қайд намуд, ки мутахассисони ин касб ҳамеша бо далерӣ, ҷасорат, муҳаббату садоқат ба кори худ ва омодагии ҳамешагӣ матонат нишон медиҳанд, зеро мубориза бо оташ аз ҳар яки онҳо кордониву зиракӣ, тахассуси баланд ва мардонагиро талаб менамояд.

Итминони комил дорам, ки афсарони баландрутба то хизматчиёни қатории ин ниҳод, минбаъд низ барои пешгирӣ намудани ҳодисаҳои нохуши сӯхтор, таъмини зиндагии осоиштаи мардум маҳорати касбӣ нишон дода, ба халқу ватани азизамон хизматҳои арзандаи шоёни таҳсин менамоянд. Дар адои чунин хизмати пуршарафу сермасъулият, ки ба манфиати давлат ва халқи Тоҷикистони азиз мебошад саломатӣ, азму иродаи қавӣ ва барору комёбӣ таманно намуд.

Баргузории Ситоди зимистонгузаронӣ

Санаи 29.07.2026 таҳти раёсати муовини якуми раиси шаҳр Даврон Муҳаммадзода Ситоди зимистонгузаронӣ баргузор гардид. Дар Ситод аъзо, роҳбарон ва масъули соҳаҳо иштирок намуданд.

Ҷиҳати иҷрои Қарори Ҳукумати Ҷумҳурии Тоҷикистон аз 28 марти соли 2026, №178 “Дар бораи саривақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва сармарабахш дар давраи тирамоҳу зимистони солҳои 2026-2027” ва қарори Раиси вилояти Суғд аз 17 апрели соли 2026, №99 “Дар бораи сари вақт омода намудани соҳаҳои иқтисодиёт ва иҷтимоиёти вилоят барои фаъолияти мунтазам ва самарабахш дар давраи тирамоҳу зимистони солҳои 2026-2027” қарори Раиси шаҳр аз 06 майи соли 2026,№123 “Дар бораи сари вақт омода намудани соҳаҳои иқтисодиёт ва иҷтимоиёти шаҳр барои фаъолияти мунтазам ва самарабахш дар давраи тирамоҳу зимистони солҳои 2026-2027” ба имзо расида, ҳайати Ситод ва нақшаи чорабиниҳо дар 21 банд таҳия ва тасдиқ шуда, ба шахсони масъул дастрас карда шудааст.

Нишасти матбуотии Раиси шаҳри Гулистон баргузор гардид

Субҳи имрӯз, санаи 29- уми июли соли равон дар толори Мақомоти иҷроияи ҳокимияти давлатии шаҳри Гулистон нишасти матбуотии Раиси шаҳри Гулистон Илҳом Пӯлотзода бо иштироки намояндагони воситаҳои ахбори омма баргузор гардид.

Зимни нишаст Раиси шаҳр оид ба натиҷаҳои рушди иҷтимоию иқтисодии шаҳри Гулистон дар нимсолаи аввали соли 2026, ҷараёни корҳои ободониву созандагӣ, омодагӣ ба таҷлили 35-солагии Истиқлоли давлатии Ҷумҳурии Тоҷикистон, татбиқи лоиҳаҳои инфрасохторӣ, рушди соҳаҳои саноат, маориф, тандурустӣ ва дигар самтҳои муҳими фаъолияти мақомоти маҳаллӣ маълумоти муфассал пешниҳод намуд.

БАРГУЗОРИИ МАҲФИЛИ “ҲУМОЮН” ДАР ШАҲРИ ГУЛИСТОН

Имрӯз, 28 июли соли 2026 дар толори Кохи фарҳангии “Истиқлол”-и шаҳри Гулистон маҳфили навбатии “Ҳумоюн” бо иштироки Шоирони халқии Тоҷикистон Фарзона ва Озарахш баргузор гардид.

Нахуст, меҳмонон аз намоиши китоб дар даромадгоҳи Кохи “Истиқлол” – и шаҳр дидан намуданд.

Маҳфилро муовини Раиси шаҳри Гулистон Муслимахон Ҷамолиён оғоз намуда, устодон ва меҳмононро ба шаҳри Гулистон хушомадед гуфт. Зикр карда шуд, ки фарҳанг ва адабиёт рукни асосии ҳастии миллат мебошанд. Таърихи миллати тоҷик исбот намудааст, ки маҳз сухани воло ва андешаи созанда моро то имрӯз ҳамчун миллати соҳибтамаддун муаррифӣ кардааст. Дар замони соҳибистиқлолӣ таҳти сиёсати фарҳангпарваронаи Пешвои муаззами миллат муҳтарам Эмомалӣ Раҳмон барои рушди фарҳанг, китобдорӣ, китобхонӣ ва эҷодиёти аҳли қалам имкониятҳои васеъ фароҳам оварда шудаанд.