Ҳамоиши наврӯзӣ ва 20-умин солгарди “Апрелевка”

Тавре маълум аст, ҳеҷ соҳаи хоҷагии халқи олам наметавонад бидуни саноат рушд намояд. Дар кишвари соҳибистиқлоли мо ба ин самт ҳамеша таваҷҷуҳи хоса зоҳир карда мешавад. Саноат яке аз соҳаҳои афзалиятноки мамлакат ба шумор рафта, дар рушди иқтисодиёти ҷумҳурӣ нақши муассир дорад. Яке аз корхонаҳои калонтарини саноатӣ, ки дар давраи соҳибистиқлолӣ бо ноил гардидан ба дастоварду нишондиҳандаҳои рӯзафзун шӯҳратёр гардидааст, ин ҶМ ТКММ “Апрелевка” мебошад.

28-уми марти соли равон дар доираи таҷлили чорабиниҳои Наврӯзи ҷаҳонафрӯз 20-умин солгарди таъсисёбии коргоҳ ҷашн гирифта шуд. Қабл аз оғози ҳамоиш Раиси шаҳри Гулистон Матлубахон Амонзода ва меҳмонон дар даромадгоҳи бинои маъмурии коргоҳ парда аз рӯи лавҳаи рамзии “Маъдани кони “Апрелевка” ба муносибати 20-солагии ҶМ ТКММ “Апрелевка” гузошта шудааст бардоштанд.

Таҷлили Наврӯз дар Адрасмон

Сокинони шаҳраки Адрасмон тантанаҳои наврӯзиро дар варзишгоҳи марказӣ доир намуданд. Қабл аз оғози чорабинӣ дар даромадгоҳи варзишгоҳ намоиши дастранҷи ҳунарҳои бадеӣ – халқии мардум, таомҳои миллӣ ва ҳафтсину ҳафтшин, ки ифодагари оинҳои наврӯзӣ буданд, доир карда шуд.

Раиси Ҷамоати шаҳрак Сафар Нурматов ба тантана ҳусни ифтитоҳ бахшида, сокинон ва меҳмононро ба иди фархундаи Наврӯз табрику муборакбод намуд. Намояндаи Мақомоти иҷроияи ҳокимияти давлатии шаҳр Илҳом Мадализода аз номи Раиси шаҳри Гулистон Матлубахон Амонзода мардуми шаҳраки Адрасмонро таҳният намуд.

Қарори Маҷлиси миллии Маҷлиси Олии Ҷумҳурии Тоҷикистон Оид ба тағйир додани номи шаҳрҳои Қайроққум, Чкалов ва ноҳияи Ғончии вилояти Суғд

Пешниҳоди Ҳукумати Ҷумҳурии Тоҷикистонро «Дар бораи пешниҳоди Маҷлиси вакилони халқи вилояти Суғд оид ба тағйир додани номи шаҳрҳои Қайроққум, Чкалов ва ноҳияи Ғончии вилояти Суғд» №29 аз 2 феврали соли 2016 баррасӣ намуда, мутобиқи моддаҳои 9 ва 19 Қонуни конститутсионии Ҷумҳурии Тоҷикистон «Дар бораи тартиби ҳалли масъалаҳои сохти марзиву маъмурии Ҷумҳурии Тоҷикистон» Маҷлиси миллии Маҷлиси Олии Ҷумҳурии Тоҷикистон қарор мекунад:

Номи шаҳрҳо ва ноҳияи зерини вилояти Суғд:

шаҳри  Қайроққум ба шаҳри Гулистон

шаҳри  Чкалов ба шаҳри Бӯстон

ноҳияи Ғончӣ ба ноҳияи Деваштич

тағйир дода шаванд.

Раиси Маҷлиси миллии Маҷлиси Олии
Ҷумҳурии Тоҷикистон М. Убайдуллоев
ш. Душанбе,  3 марти соли 2016 № 204

Тантанаҳои наврӯзӣ дар Гулистон

19-уми март дар боғи фарҳангу фароғатии “24-солагии Истиқлолияти давлатии Ҷумҳурии Тоҷикистон”-и маркази шаҳр бо иштироки Раиси шаҳри Гулистон Матлубахон Амонзода тантанаҳои бошукӯҳи наврӯзӣ баргузор гардиданд.

Наврӯзи имсола барои мардуми шарифи шаҳр хотирмону таърихӣ гардид. Зеро дар арафаи ҷашни Наврӯзи байналмилал бо ҳидоят ва пешниҳоди Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ба шаҳр номи Гулистон дода шуд.

Он рӯз шаҳр қабои идона ба бар намудаву рӯҳияи мардумон ҷашниву баҳорона буд. То ҷашни Наврӯз ҳамарӯза ҳашарҳои ободонию сабзкорӣ гузаронида мешуд.