Табрикоти И.в Раиси шаҳри Гулистон Раъно Ҳошимзода ба муносибати Иди Сада

Ҳамшаҳриёни гиромӣ!

Ҷашни Сада дар миёни ҷашнҳои мардумии мо аз қабили Наврӯзи байналмилал, Меҳргон ва Тиргон  мақому манзалати хоса дорад, зеро он ифодагари омодагӣ ба гардиши табиат мебошад.

Бо шарофати Истиқлолияти давлатӣ, сиёсати хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар кишвари мо файзу баркати хосаи идҳои аҷдодӣ ва миллӣ шукӯҳу шаҳомати тоза пайдо намуда, онҳо ба густариши оинҳои мардумӣ мусоидат карда, барои такомули худшиносиву худогоҳии миллӣ ва ватандӯстиву ташаккули маънавият такони нерубахши худро эҳдо месозанд.

Пешвои миллат муҳтарам Эмомалӣ Раҳмон доир ба ин ҷашни ниёгон чунин гуфтаанд: “Сада аз ҷумлаи чунин ҷашнҳои бостонии мо мебошад, ки дар аҳди қадим, махсусан, замони Сомониён бо шукӯҳу шаҳомати хос истиқбол мегардид ва дар даврони соҳибистиқлолӣ аз нав эҳё гардида, шаш сол аст, ки дар саросари кишвар баргузор мешавад. Дар айёми таҷлили ин ҷашн мардум шодиву хурсандӣ карда, анъанаҳои неки халқамонро такмил мебахшанд ва фарҳанги миллии тоҷиконро ба ҷаҳониён муаррифӣ месозанд. Ҷашни Сада, дарвоқеъ, таҷассуми ғояҳои неки башардӯстона буда, мардумро ба дӯстиву бародарӣ ва заҳмату ободкорӣ даъват менамояд”.

ҲАШАРИ УМУМИШАҲРӢ

Дируз иҷрокунандаи вазифаи раиси шаҳри Гулистон Ҳошимзода Раъно дар машварати корӣ бо роҳбарону фаъолони шаҳр дастур доданд, ки ба корҳои ободонию сабзкорӣ дар шаҳри Гулистон вусъати тоза бахшида шавад.

Ҳамин тавр 29 январи соли 2022 дар қаламрави шаҳр ҳашари умумишаҳрӣ бо иштироки кормандони Мақомоти иҷроияи ҳокимияти давлатии шаҳр,  ташкилоту корхона ва муассисаҳо баргузор гардид. Дар ин чорабинии оммавӣ муассисаҳои маориф, фарҳанг, тандурустӣ, мактаби варзишӣ, коллеҷи тиббӣ, шабакаҳои барқии Суғд, ҶСК “Қолинҳои Қайроққум” ва дигар соҳаҳои хоҷагии халқи шаҳр фаъолона иштирок намуданд. Дар ҳашари умумишаҳрӣ зиёда аз 500 нафар иштирок намуданд. Ҳашарчиён гирду атрофи корхонаву муассисаҳо ва мавзеъҳои истироҳатиро аз ҳама гуна хасу хошок, баргҳои дарахтон ва партовҳо тоза намуданд.

Чунин ҳашарҳо дар ҷамоати шаҳракҳо низ ба роҳ монда шуд. Ҳадаф аз баргузории ҳашарҳои дастаҷамъона баланд бардоштани маърифати шаҳрдорӣ, тозаву озода нигоҳ доштани муҳити зист, пешгирии ҳар гуна бемориҳои сироятӣ ва ба ин васила таъмини беҳдошти солимии ҷомеа мебошад.

Маҷидӣ Бахтиёр Саидаҳмадзода директори генералии корхонаи муштараки “Апрелевка” таъин карда шуд

Имрӯз дар толори корхонаи муштараки Тоҷикистону Канадагии масъулияташ маҳдуди “Апрелевка” дар шаҳри Гулистон маросими муарифии директори генералии корхонаи мазкур сурат гирифт.

Раиси вилояти Суғд Раҷаббой Аҳмадзода зимни суҳбат бо коргарони корхонаи муштарак иттилоъ дод, ки дар мувофиқа бо Президенти мамлакат муҳтарам Эмомалӣ Раҳмон Маҷидӣ Бахтиёр Саидаҳмадзода директори генералии корхонаи муштараки Тоҷикистону Канадагии масъулияташ маҳдуди “Апрелевка” таъин карда шуд.

Зикр гардид, ки Маҷидӣ Бахтиёр Саидаҳмадзода аз кадрҳои лаёқатманд буда, ба ҳайси раиси шаҳри Гулистон дар пешрафти шаҳр саҳми худро гузоштааст.

Маросими муарифии иҷрокунандаи вазифаи раиси шаҳри Гулистон

Имрӯз дар мақомоти иҷроияи ҳокимияти давлатии шаҳри Гулистон маросими муарифии иҷрокунандаи вазифаи раиси шаҳр баргузор гардид.

Раиси вилояти Суғд Раҷаббой Аҳмадзода фармонҳои Президенти Ҷумҳурии Тоҷикистон дар бораи аз вазифаи раиси шаҳри Гулистон озод намудани Бахтиёр Саидаҳмадзода ва иҷрокунандаи вазифаи раиси шаҳри Гулистон таъин намудани Раъно Ҳошимзодаро ба самъи кормандони мақомоти иҷроия ва фаъолони шаҳр расонид.

Чуноне иттилоъ дода шуд, Маҷидӣ Бахтиёр Саидаҳмадзода бо сабаби ба кори дигар гузаштан аз вазифаи раиси шаҳри Гулистон озод гардида, Раъно Ҳошимзода иҷрокунандаи вазифаи раиси шаҳр таъин шуд.