БОЗДИДИ РАИСИ ВИЛОЯТИ СУҒД РАҶАББОЙ АҲМАДЗОДА АЗ НЕРӮГОҲИ БАРҚӢ-ОБИИ "ҚАЙРОҚҚУМ"

Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми худ ба Маҷлиси Олии мамлакат таъкид карданд, ки дар замони соҳибистиқлолӣ аз ҷониби Ҳукумати мамлакат барои навсозӣ, яъне таъмиру таҷдиди низоми энергетикии кишвар 85,7 миллиард сомонӣ равона карда шудааст.

Дар ин давра танҳо барои азнавсозии неругоҳҳои барқи обии амалкунанда беш аз 11,3 миллиард сомонӣ равона гардида, неругоҳи барқи обии «Сарбанд» пурра таҷдид ва иқтидори он 30 мегаватт зиёд карда шуд. Инчунин, таҷдиди неругоҳҳои «Норак» ва «Қайроққум» бомаром идома дошта, баъди ба анҷом расидани корҳо иқтидори онҳо, дар маҷмӯъ, 423 мегаватт афзоиш меёбад. Нуктаи муҳим ин аст, ки неругоҳҳои зикршуда баъди азнавсозӣ ба мардуми Тоҷикистон боз даҳсолаҳои дигар хизмат хоҳанд кард.

Раиси вилояти Суғд Раҷаббой Аҳмадзода зимни шиносоӣ бо корҳои таҷдиди нерӯгоҳи «Қайроққум» таваҷҷуҳи масъулинро ба иҷрои босифати корҳо ва дар амал татбиқ намудани дастуру супоришҳои Пешвои миллат муҳтарам Эмомалӣ Раҳмон ҷалб намуд.

ШИНОСОӢ БО ФАЪОЛИЯТИ ШИРКАТИ КУҲӢ-САНОАТИИ ТОҶИКИСТОНУ ХИТОЙ

Рушди соҳаи саноат, афзун намудани ҳаҷми истеҳсолот, ба кор андохтани хатҳои нави истеҳсолӣ ва то ба коркарди ниҳоӣ расонидани ашёи хоми ватанӣ аз ҳадафҳои олии Ҳукумати кишвар ба ҳисоб рафта, бо ин мақсад як қатор барнома ва лоиҳаҳои хурду бузург амалӣ карда мешавад.

ҶДММ "Ширкати куҳӣ-саноатии Тоҷикистону Хитой" аз зумраи бузургтарин корхонаи саноатии вилоят ва ҷумҳурӣ ба ҳисоб рафта, дар ин коргоҳ асосан коркарди маъдан ва истеҳсоли консентрати сурб, руҳ ва хокаи мисс ба роҳ монда шудааст.

Раиси вилояти Суғд Раҷаббой Аҳмадзода бо раванди истеҳсолот дар ин корхонаи азими саноатӣ аз наздик шинос гардида, ба масъулин ҷиҳати баланд бардоштани ҳаҷми истеҳсоли маҳсулот, истифодаи самараноки иқтидори корхона, бо кори доимӣ таъмин намудани шаҳрвандон ва иҷрои уҳдадориҳо дастуру супоришҳои мушаххас дод.

ОҒОЗИ МАЪРАКАИ НИҲОЛШИНОНӢ ДАР ШАҲРИ ГУЛИСТОН

Санаи 5 январ дар Қароргоҳи Сарвари давлат дар шаҳри Гулистон ҳашари ниҳолшинонӣ баргузор гардид, ки  дар он Раиси вилояти Суғд Раҷаббой Аҳмадзода низ иштирок намуд.

Аз ҷониби роҳбари вилоят супориш дода шуд, ки мутахасисони соҳа барои интихоби навъи дарахт, макон ва замони шинонидани он, ҳамзамон тарзи дурусти шинонидану парвраиши дарахтон ба шаҳрвандон маслиҳатҳои зарурӣ диҳанд.

Ба иттилои мутахасисон алҳол вақти шинонидани ниҳолу дарахтон буда, бо риояи қоидаҳо ва талабот метавон ба маъракаи ниҳолшинонӣ вусъат бахшид.

ТАБРИКОТИ РАИСИ ШАҲРИ ГУЛИСТОН РАЪНО ҲОШИМЗОДА БА МУНОСИБАТИ ФАРОРАСИИ СОЛИ НАВИ МЕЛОДИИ 2024

Ҳамшаҳриёни азиз!

Мо дар остонаи таҷлили Соли нави мелодии 2024 қарор дорем. Ба ин муносибат ҳамагонро аз номи Мақомоти иҷроияи ҳокимияти давлатии шаҳри Гулистон табрик гуфта, ба ҳар як сокини шаҳр саломатӣ, умри бобаракат, саодату комёбӣ, пешрафту ободии бештар ва суботу оромии ҷовидона орзумандам.

Соли 2023 дар партави сиёсати хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мардуми шарифи Тоҷикистон ба хотири боз ҳам ободу зебо гардонидани Ватани биҳиштосои худ сарҷамъу аҳлона ва беш аз ҳар вақти дигар заҳмат кашиданд.

Сокинони шаҳри соҳили «Баҳри тоҷик» низ дар радифи намояндагони дигар манотиқи кишвар дар соли 2023 ғайратмандона меҳнат намуда, дар татбиқи сиёсати фардосози Пешвои муаззами миллат ва Ҳукумати Ҷумҳурии Тоҷикистон собитқадамона саҳми арзишманди худро дар рушду нумӯи давлати соҳибистиқлоли худ гузоштанд.