БАРГУЗОРИИ БАРНОМАҲОИ ФАРҲАНГИВУ АДАБИИ ШАҲРИ ГУЛИСТОН ДАР ПОЙТАХТИ КИШВАР - ШАҲРИ ДУШАНБЕ

Бегоҳирӯзии 05.08.2023 тибқи нақшаи тасдиқгардидаи Дастгоҳи иҷроияи Презиленти Ҷумҳурии Тоҷикистон дар боги ба номи "Низомиддин Алишер Навоӣ"-и шаҳри Душанбе барномаи фарҳангиву адабии санъаткорони шаҳри Гулистон пешкаши сокинони пойтахт карда шуд.

Дар чорабинии фарҳангӣ муовини Раиси шаҳри Душанбе Сиҷоуддин Саломзода, Раиси шаҳри Гулистон Раъно Ҳошимзода, роҳбари гурӯҳи корӣ ба истиқболи 35-солагии Истиқлоли давлатии Ҷумҳурии Тоҷикистон, директори Агентии таъминоти амволи махсуси назди Ҳукумати Ҷумҳурии Тоҷикистон Савзаалӣ Назирзода ва дигар шахсони масъул иштирок доштанд.

Нахуст муовини Раиси шаҳри Душанбе Сиҷоуддин Саломзода суханронӣ намуда,  аз рушду тараққиёти кишвар таҳти роҳбарии хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ёдовар гардида, ба сокинони шаҳри Гулистон ҷиҳати пешкаш намудани намоиш-фурӯши маҳсулоти кишоварзӣ, ҳунарҳои мардумӣ, таомҳои миллӣ ва барномаи фарҳангиву адабӣ изҳори сипос намуд.

БАРҚИЯИ ИЗҲОРИ ТАСАЛЛӢ!

Мақомоти иҷроияи ҳокимияти давлатии шаҳри Гулистон аз номи сокинони шаҳр ба аҳли хонавода ва пайвандони фавтидагони садамаи мудҳиши нақлиётӣ дар шаҳри Кӯлоб  ки 6-уми августи соли ҷорӣ дар роҳи "Душанбе-Кулоб-Хоруғ" дар километри якум дар ҳудуди кӯчаи Ҷумъа Алии шаҳри Кӯлоб  рӯй дода, талафоти моливу ҷониро ба миён овард, изҳори ҳамдардӣ намуда, ба аҳли пайвандони ҳалокшудагон аз даргоҳи Худованд сабри ҷамил ва ба маҷруҳшудагони ин садамаи фоҷиабор шифои комилу оҷил хоҳон аст.

Бани одам аъзои якдигаранд,

Ки дар офариниш зи як гавҳаранд.

Чу узве ба дард оварад рӯзгор,

Дигар узвҳоро намонад қарор.

Бо Шумо ғамшарикем, мардуми Кӯлоби бостон!

НАМОИШ-ФУРӮШИ МАҲСУЛОТИ КИШОВАРЗӢ, САНОАТӢ, ҲУНАРҲОИ МАРДУМӢ, ТАОМҲОИ МИЛЛӢ ДАР ПОЙТАХТИ КИШВАР-ШАҲРИ ДУШАНБЕ

Санаи 05.08.2023 дар Боғи ба номи «Низомиддин Алишери Навоӣ»-и шаҳри Душанбе намоиш-фурӯши маҳсулоти кишоварзӣ, ҳунарҳои мардумӣ, таомҳои миллии шаҳри Гулистон баргузор гардид, ки аз ҷониби сокинони пойтахт ба қаноатмандӣ ва хушҳолӣ пазируфта шуд.

Дар чорабинии мазкур муовини Раиси шаҳри Душанбе Сиҷоуддин Саломзода, Раиси шаҳри Гулистон Раъно Ҳошимзода, роҳбари гурӯҳи корӣ ба истиқболи 35-солагии Истиқлоли давлатии Ҷумҳурии Тоҷикистон, директори Агентии таъминоти амволи махсуси назди Ҳукумати Ҷумҳурии Тоҷикистон Савзаалӣ Назирзода ва дигар шахсони масъул иштирок доштанд.

Тибқи нақшаи баргузории намоиш-фурӯши маҳсулоти кишоварзӣ, ҳунарҳои мардумӣ, таомҳои миллӣ ва барномаҳои фарҳангиву адабии шаҳру ноҳияҳои ҷумҳурӣ дар пойтахти мамлакат — шаҳри Душанбе, ки аз тарафи роҳбари Дастгоҳи иҷроияи Президенти Ҷумҳурии Тоҷикистон тасдиқ шудааст, ин навбат барои сокинон ва меҳмонони шаҳри Душанбе кишоварзони шаҳри Гулистон маҳсулоти кишоварзиро бо нархи арзон ва сифати хуб пешниҳод намуданд. Аз ҷумла, 5 тонна орд бо нархи 200 сомонӣ барои як халтаи 50 килоӣ, 2 тонна пиёз бо нархи 1,5 сомонӣ барои 1 кг, 2 тонна картошка бо нархи 3 сомонӣ барои 1 кг, 2 тонна сабзӣ бо нархи 2 сомонӣ барои 1 кг, 300 кг гӯшти гӯсфанд бо нархи 55 сомонӣ барои 1 кг, 300 кг гӯшти гов бо нархи 55 сомонӣ барои 1 кг, 2 тонна гӯшти мурғ бо нархи 20 сомонӣ барои 1 кг, 5 ҳазор дона тухм бо нархи 66 дирам барои 1 дона, 300 дона тарбуз ва 300 дона харбуза бо нархи 10 сомонӣ барои 1 дона ба савдо бароварда шуданд.

ЭЪЛОН!

Ба таваҷҷуҳи сокинону меҳмонони пойтахти Ватани азизамон - шаҳри Душанбе ва ҳаводорони санъату ҳунари волои тоҷик мерасонем, ки санаи 05 августи соли 2023, соати 08:00 дар боғи фарҳангӣ-фароғатии ба номи "Низомиддин Алишер Навоӣ"-и шаҳри Душанбе намоиш-фурӯши маҳсулоти озуқаворӣ,  саноатӣ, ҳунарҳои мардумӣ, таомҳои миллии шаҳри Гулистон ва бегоҳирӯзӣ соати 18:00  барномаҳои фарҳангиву адабии санъаткорони шаҳр доир мегардад!

Марҳамат ба рӯзҳои фарҳангии шаҳри Гулистон ба боғи фарҳангӣ-фароғатии ба номи "Низомиддин Алишер Навоӣ"!