Таҷлили 30-юмин солгарди таъсисёбии Кумитаи ҳолатҳои фавқулодда ва мудофиаи граждании Ҷумҳурии Тоҷикистон дар қисми ҳарбии 45025

Имрӯз, 17.08.2024 дар қисми ҳарбии 45025-и Кумитаи ҳолатҳои фавқулодда ва мудофиаи граждании вилояти Суғд ба  муносибати 30-юмин солгарди таъсисёбии Кумитаи ҳолатҳои фавқулодда ва мудофиаи граждании Ҷумҳурии Тоҷикистон ва Рӯзи кормандони хадамоти ҳолатҳои фавқулодда ва мудофиаи гражданӣ чорабинии тантанавӣ доир гардид.

Чорабинӣ бо садо додани Суруди миллӣ оғоз гардид.

Раиси шаҳри Гулистон Раъно Ҳошимзода афсарону сарбозони қисми ҳарбиро ба ин муносибат муборак бод намуда, зимни суханронӣ таъкид намуд, ки айни замон, Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон мақомоти давлатии идораи мудофиаи граждании Ҷумҳурии Тоҷикистон буда, сиёсати ягонаи давлатиро дар соҳаи мудофиаи гражданӣ, дар бобати омодагӣ ва ҳифзи аҳолӣ, иншоотҳои иқтисодӣ ва ҳудуди Ҷумҳурии Тоҷикистон аз оқибатҳои ҳолатҳои фавқулодда замони осоишта ва ҷанг роҳбарии сиёсати ягонаи давлатиро анҷом дода, тамоми маҷмӯи чорабиниҳои умумидавлатӣ, ҳуқуқӣ мудофиавӣ ва дигар чорабиниҳоро, ки ба ҳифзи аҳолӣ, иншоотҳои иқтисодӣ ва ҳудуди Ҷумҳурии Тоҷикистон аз оқибатҳои офатҳои табиӣ ва экологӣ, садамаҳои калони истеҳсолӣ, фалокатҳо нигаронида шудаанд, инчунин ҳангоми аз ҷониби душман истифода гардидани воситаҳои ҳозиразамони зарба сар мезананд, амалӣ ва ҳамоҳанг месозад. Кумита сохтори ҳарбӣ буда, ба он тамоми ҳуқуқҳо, меъёрҳои ҳифзи иҷтимоӣ ва ҳуқуқӣ, ки барои хизматчиёни ҳарбии Ҷумҳурии Тоҷикистон ва аъзои оилаи онҳо қабул шудаанд, татбиқ мегардад.

ҚАБУЛИ ШАҲРВАНДОН

Рӯзи 17-уми августи соли 2024 аз тарафи Раиси шаҳри Гулистон Раъно Ҳошимзода  5-нафар шаҳрванд қабул карда шуд.

Муҳтавои муроҷиат масъалаҳои гуногунро дарбар гирифта,  расонидани кумаки моддӣ ва таъмири бинои истиқоматӣ, таъмин намудан бо хонаи истиқоматӣ,  таъмир ва мумфарши роҳҳо ва ғайра мебошанд.

Масъалаи баррасии талабу дархости муроҷиаткунандагон  ба шуъбаву бахшҳои дахлдор равона карда шуд.  Раиси шаҳр масъулинро вазифадор  намуд, ки иҷроиши масъалаи  мазкурро дар муддати кӯтоҳ иҷро карда,  аз натиҷааш ба унвони Раиси шаҳр ва муроҷиаткунандагон тариқи хаттӣ хабар дода шавад.

ТАБРИКНОМАИ РАИСИ ШАҲРИ ГУЛИСТОН РАЪНО ҲОШИМЗОДА БА МУНОСИБАТИ РӮЗИ КОРМАНДОНИ КУМИТАИ ҲОЛАТҲОИ ФАВҚУЛОДА ВА МУДОФИАИ ГРАЖДАНӢ

Дӯстони азиз!

Наҷотдиҳандагони ҷону моли инсоният!

Боиси хушнудист, ки имсол таҷлили 30-солагии таъсисёбии Кумитаи ҳолатҳои фавқулода ва мудофиаи граждании ҷумҳурӣ ба 30-солагии қабули Конститутсияи Ҷумҳурии Тоҷикистон рост омада истодааст.   Ба ин муносибат Мақомоти иҷроияи ҳокимияти  давлатии шаҳри Гулистон ҳамаи  кормандони соҳаи ин хизматрасониро самимона табрик гуфта, ба онҳо дар кори масъулиятнок, заҳматталаб ва ҳамзамон бошарафашон барору комёбӣ таманно менамояд.

Кумитаи ҳолатҳои фавқулода ва мудофиаи гражданӣ замоне таъсис ёфт, ки Ҷумҳурии Тоҷикистон дар фазои истиқлолият парвоз мекард.   Инак, дар тӯли ин қадар сол базаи кадрию техникии ин соҳа мустаҳкам гардида,  имкон медихад, ки талафотҳо ва талафоти молиявӣ кам карда шавад. Кормандони ситоди ҳолатҳои фавқулода ва мудофиаи граждании шаҳри Гулистон шахсоне мебошанд, ки ба мардуми ниёзманд ва дармонда дасти ёрӣ дароз намуда, онҳоро аз ҳар гуна офат ва ҳолатҳои фавқулода наҷот медиҳанд.   Бесабаб нест, ки дар солхои охир боварии халк ба коркунони ин соҳа афзуда аст ва сабаби оромии мардум низ гашта аст.

АЁДАТИ СОБИҚАДОРИ СОҲАИ ТИБ

Раиси шаҳри Гулистон Раъно Ҳошимзода ба муносибати Рӯзи кормандони соҳаи тиб  собиқадори соҳаи тибби шаҳр Исмоилов Нематҷонро аёдат намуд. Номбурда пас аз хатми Донишгоҳи тиббии Тоҷикистон шуруъ аз соли 1964 то соли 2010 дар муассисаҳои тиббии шаҳр ҳамчун табиби осебшинос фаъолияти меҳнатӣ намуда, дар сиҳатбахшии ҷомеа саҳми арзишманд гузоштааст.

Собиқадори соҳаи тиб бо хушҳолӣ ва фараҳмандӣ аз фазои сулҳу осоиш ва Истиқлоли давлатии кишвар миннатдории самимии хешро ба Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон иброз намуд. Ҳамасола дар кишвар 18-уми август ҳамчун рӯзи табибон таҷлил карда мешавад.

Таҷлили ин сана ба ифтихори кормандони соҳаи тиб рӯҳияи онҳоро боло бардошта, барои фаъолияти содиқонаи касбӣ ба онҳо неру мебахшад. Хидматҳои содиқонаи собиқадорони соҳа ҳаргиз фаромӯш нахоҳад шуд.