ИЛМУ МАЪРИФАТ - САРЧАШМАИ САОДАТИ ИНСОН!

Имрӯз, 18.04.2024 дар толори бахши фарҳанги шаҳр Тибқи нақшаи тасдиқгардида аз ҷониби Мақомоти иҷроияи ҳокимияти давлатии вилояти Суғд Рӯзи ягонаи ахбори сиёсӣ таҳти унвони “Илму маърифат сарчашмаи саодати инсон” дар партави эълон гардидани соли маърифати ҳуқуқӣ бо ҳузури кормандони соҳаҳои гуногун ва донишҷӯёну хонандагон баргузор карда шуд.

Дар чорабинии мазкур муовини Раиси шаҳр Шарифҷони Саидраҳмон, ҳайати гурӯҳи таблиғотии вилоят Саидумрон Саидов номзади илмҳои филологӣ, дотсент, устоди МДТ “Донишгоҳи давлатии Хуҷанд ба номи академик Бобоҷон Ғафуров”, Дилбар Бобоҷонова номзади илмҳои филологӣ, дотсент, устоди МДТ “Донишгоҳи давлатии Хуҷанд ба номи академик Бобоҷон Ғафуров” ва Фаридуншоҳ Абдуллоев мутахассиси татбиқи забон дар МИҲД-и шаҳр иштирок ва суханронӣ намуданд.

Зикр карда шуд, ки дар замони имрӯз бешубҳа омӯхтани илму дониш ягона роҳи ба саодат расидани инсонҳо мебошад. Доир ба ин мавзуъ Пешвои муаззами миллат муҳтарам Эмомалӣ Раҳмон дар ҳар як суханронии худ махсусан таъкид мекунанд, ки илм омӯзем, дониш омӯзем, фарзандонамонро ба роҳи дуруст тарбия кунем ба омӯхтани забонҳои хориҷӣ ва илмҳои дақиқ бештар таваҷҷуҳ намоем.

ГУЛИСТОН: ДАВРИ ШАҲРИИ ОЗМУНИ ҶУМҲУРИЯВИИ “ТОҶИКИСТОН – ВАТАНИ АЗИЗИ МАН” БАРГУЗОР ГАРДИД

Санаи 17.04.2024 дар толори мактаби санъати шаҳр даври шаҳрии озмуни ҷумҳуриявии “Тоҷикистон – Ватани азизи ман” баргузор гардид. Дар маросими ифтитоҳи озмун муовини Раиси шаҳри Гулистон Ғайрат Оқилзода суханронӣ намуд. Таъкид карда шуд, ки тибқи Амри Президенти Ҷумҳурии тоҷикистон аз 1 январи соли 2024 №АП-479, қарори Раиси вилоят аз 26.02.2026, №48 ва қарори Раиси шаҳри Гулистон аз 29.03.2024, №95 озмуни мазкур баргузор гардида истодааст.

Озмун бо мақсади дарёфти истеъдодҳои нав дар соҳаи санъати мусиқӣ ва сарояндагӣ, тасвирӣ ва дизайн, баланд бардоштани маҳорати касбӣ ва зебоишиносӣ, тақвият бахшидан ба ҳунари баланди иҷрокунандагӣ, таблиғ ва эҳёи ҳунарҳои мардумӣ, муаррифии фарҳанги волои миллати тоҷик, эҳтиром ва арҷгузорӣ ба суннатҳои неки аҷдодӣ, сатҳи касбии асарҳои нави мусиқӣ, офарандагӣ, интихоби намунаҳои беҳтарини оҳангу суруд, коллексияҳо ва асарҳои рассомӣ, ки инъикоскунандаи фарҳанги гузашта ва имрӯзаи миллати тоҷикро таҷассум намоянд, гузаронида мешавад.

Мазмун ва ғояи асосии суруду оҳанг ва асарҳои мусиқиро, ки ба озмун пешниҳод мешаванд, тараннуми шахсиятҳои барҷастаи халқи тоҷик, дастовардҳои замони Истиқлоли давлатӣ, арҷ гузоштан ба анъанаҳои милливу мероси пурғановати ниёгон дар бар мегирад.

Боздиди Раиси вилоят аз Нерӯгоҳи барқи обии "Қайроққум"

Раиси вилояти Суғд Раҷаббой Аҳмадзода дар шаҳри Гулистон бо таҷдид ва барқарорсозии Нерӯгоҳи барқи обии "Қайроққум" шинос гардид.

Тавре аснои шиносоӣ маълумот дода шуд, навсозии агрегатҳои иншооти муҳими соҳаи энергетика тибқи нақша ҷараён дорад.

НБО «Қайроққум» дорои шаш агрегат буда, корҳои сохтмонии он соли 1952 оғоз гардидаанд. Агрегати якуми он бо иқтидори 21 мегаватт 15 декабри соли 1956 ба кор дароварда шудааст. Иншооти гидроэнергетикӣ аз 20 ноябри соли 1957 бо иқтидори пурраи 126 мегаватт фаъолият намуда, бо сабаби фаъолияти беш аз нимасра таҷҳизоти неругоҳ кӯҳнаю фарсуда гардида, зарурати таҷдид ва навсозии онро ба миён овард.

Дар асоси дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон айни замон лоиҳаи «Таҷдиди Неругоҳи барқи обии "Қайроққум» амалӣ шуда истодааст.

Шиносоӣ бо бунёди корхонаҳои нави саноатӣ дар шаҳри Гулистон

Дар минтақаи саноатии шаҳри Гулистон тибқи дастуру ҳидоятҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сохтмони коргоҳи истеҳсоли қубурҳои полиэтиленӣ ва ноқил идома дорад.

Аснои шиносоии Раиси вилояти Суғд Раҷаббой Аҳмадзода бо ҷараёни корҳои сохтмонӣ иттилоъ дода шуд, ки маҳсулоти дар оянда истеҳсолшаванда воридотивазкунанда мебошад.

Коргоҳ аз ҷониби соҳибкори инфиродӣ Саидбой Абдуллоев сохта шуда, корҳои созандагӣ дар иншоот тибқи нақша пеш меравад. Мусаллам аст, ки дар бозори дохил ва берун аз он талабот бо ноқилҳои барқӣ зиёд аст. Дар коргоҳ истеҳсоли қубурҳои полиэтиленӣ барои обёрии заминҳо ва беш аз 10 намуди ноқилҳои барқӣ ба роҳ монда мешавад.