Иҷлосияи ғайринавбатии бистуми Маҷлиси вакилони халқи шаҳри Гулистон, даъвати шашум баргузор гардид

Имрӯз, 12.12.2024 таҳти раёсати Раиси шаҳри Гулистон, Раиси Маҷлиси вакилони халқи шаҳр Раъно Ҳошимзода Иҷлосияи ғайринавбатии бистуми Маҷлиси вакилони халқи шаҳри Гулистон, даъвати шашум баргузор гардид.

Иҷлосия бо садо додани суруди миллӣ ва интихоби котибот оғоз гардид.

Дар кори Иҷлосия муовини якум, муовинони Раиси шаҳр, роҳбари дастгоҳи Раиси шаҳр, роҳбарони сохторҳои шаҳр ва вакилони Маҷлиси вакилони халқи шаҳр иштирок намуданд.

Дар Иҷлосия масъалаҳои интихоботи вакилони Маҷлиси вакилони халқи шаҳри Гулистон, даъвати ҳафтум, ташкил намудани Комиссияи шаҳрии интихобот оид ба интихоботи вакилони Маҷлиси вакилони халқи шаҳри Гулистон, даъвати ҳафтум, миқдори ҳавзаҳои ҳудудии интихобот оид ба интихоботи вакилони Маҷлиси вакилони халқи шаҳри Гулистон, даъвати ҳафтум ба баррасӣ гузошта шуда, аз ҷониби вакилон қарорҳои дахлдор қабул карда шуд.

БАРГУЗОРИИ ЧОРАБИНИИ МУДОФИАИ ҲУДУДӢ ВА САФАРБАРӢ ДАР ШАҲРИ ГУЛИСТОН

Имрўз 12.12.2024 дар варзишгоҳи марказии шаҳри Гулистон чорабинии мудофиаи ҳудудӣ ва сафарбарӣ баргузор гардид, ки дар он кормандони мақомоти низомӣ инчунин мардони дар ҳайати захирабуда дар маҷмуъ беш аз 3000 нафар иштироки фаъолона намуданд. Ҳамчунин дар ин чорабинӣ техникаҳои гуногуни хоҷагии халқи шаҳр низ бароварда шуд.

Аз рафти баргузории ҳамоиш Эмомалӣ Собирзода, генерал–лейтенант, сардори Ситоди генералии Қувваҳои Мусаллаҳ- муовини якуми Вазири мудофиаи мамлакат ва Раиси шаҳри Гулистон Раъно Ҳошимзода шиносоӣ пайдо намуданд.

Эмомалӣ Собирзода, генерал –лейтенант, сардори Ситоди генералии Қувваҳои Мусаллаҳ-муовини якуми Вазири мудофиаи мамлакат бо кормандони мақомоти низомӣ инчунин шаҳрвандони касбу кори гуногуни дар ҳайати захирабуда суҳбати озоду ошкоро намуд.

БАРГУЗОРИ ВОХӮРӢ БО ДОНИШҶӮДУХТАРОНИ КОЛЛЕҶИ ТИББӢ ДАР МАВЗУИ "ҲАЁТ БИДУНИ ЗӮРОВАРӢ"

Санаи 10.12.2024 дар толори мактаби санъати шаҳр вохӯрӣ дар мавзуи "Ҳаёт бидуни зӯроварӣ" бахшида ба ҷамъбасти маъракаи иттилоотии "16-рӯзи алайҳи хушунат нисбат ба занон" баргузор гардид.

Дар вохӯрӣ мудири бахши кор бо занон ва оилаи шаҳр Матлуба Сатторова ва мутахассиси татбиқи забон дар МИҲД-и шаҳр Фаридуншоҳ Абдуллоев иштирок ва суханронӣ намуданд.

Зикр карда шуд, ки ҳамасола дар тамоми ҷаҳон аз санаи 25 ноябр то 10 декабр гузаронидани Маъракаи иттилоотӣ бахшида ба "16 рӯзи алайҳи хушунат нисбати занон"-ро қайд мекунад, ки он бахшида ба қабули Конвенсия оид ба бартараф намудани ҳамагуна маҳдудкунҳхо нисбати занон қабул карда шудааст. Интихоби 10 декабр ҳамчун рӯзи хотимавӣ низ бесабаб нест, зеро ин руз-Рӯзи байналхалқии ҳифзи ҳуқуқи инсон аст. Ҳадаф аз гузаронидани чунин чорабиниҳо ин ба мардуми кишвар бори дигар ёдоварӣ кардан аст, ки: "Байни зану мард зӯроварӣ набояд бошад, ба ҷои он меҳру муҳаббат нисбат ба ҳамдигар ҳукмронӣ намояд".

ҲИФЗИ АРЗИШҲОИ МИЛЛӢ РИСОЛАТИ ШАҲРВАНДИСТ!

Санаи 11.12.2024, дар толори хурди Мақомоти иҷроияи ҳокимияти давлатии шаҳри Гулистон дар асоси нақшаи муштараки бахши кор бо ҷавонон ва варзиши шаҳр ва хадамоти шиносномадиҳӣ ва бақайдгирии  ШВКД Ҷумҳурии Тоҷикистон дар шаҳри Гулистон ҳамоиш таҳти унвони "Ҳифзи арзишҳои миллӣ рисолати шаҳрвандист!" ва маросими шиносномадиҳӣ баргузор гардид. Дар ҳамоиши мазкур мудири бахши кор бо ҷавонон ва варзиши шаҳри Гулистон Аҳлиддин Абдураҳмонов ва сардори хадамоти шиносномадиҳӣ ва бақайдгирии ШВКД Ҷумҳурии Тоҷикистон дар шаҳри Гулистон майори милится Тағоймуродзода Сулаймон  иштирок ва суханронӣ намуданд.

Таъкид гардид, ки имрӯз мебояд асоси тафаккури нави сиёсӣ ва фарҳангии шаҳрвандон ба хусус ҷавононро ғояи таҳкими истиқлолияти давлатӣ, ваҳдату худшиносии миллӣ, ҳисси ватандӯстиву ватанпарастӣ, таъмини амнияти давлату миллат, ҳифзи тамомияти арзӣ ва манфиатҳои умумимиллӣ ва эҳтиром ба шиносномаи миллӣ ташкил диҳад. Арзишҳои умумимиллӣ ва умумидавлатии Тоҷикистони соҳибистиқлол ва ҳифзи манфиатҳои кишвар бояд аз ҳама гуна манфиатҳои сиёсӣ, мазҳабӣ ва гурӯҳӣ боло бошад ва пойдевори тарбияи ватандӯстии ҷавононро фаро гирад. Ҷавонон бояд муҳофизони боэътимоди Ватан, амнияти давлату миллат, сарчашмаи ташаббусҳо ва манбаи асосии кадрҳои ояндаи кишвар бошанд.