Муборакбодии Раиси шаҳри Қайроққум Матлубахон Амонзода ба ифтихори 30 сентябр-Рӯзи Ҷалолиддини Балхӣ

Ҳамшаҳриёни азиз!

Дар кишвари соҳибистиқлоли мо ҳар сол 30 сентябр ҳамчун Рӯзи Ҷалолиддини Балхӣ таҷлил карда мешавад. Ҷалолиддини Балхӣ бо эҷодиёти пурмӯҳтавояш тавонистааст, ки  ганҷинаи ҳикмату ишқ, ҷаҳони андеша ва иқлими ҷонҳоро равшанӣ бахшад. Ба суолҳои печидаи инсоният посух дода, барои имрӯзиён аз қаъри таърих паёми сабзи сулҳу сафо ба ҳадя оварда, душвортарин водиҳои хештаншиносиро тай намуда, монанди хуршед тулӯъ намояд.

Имрӯз дар ҷаҳони ғарбӣ ҳам ҷавоби бисёре мушкилоти худро дар осори Мавлоно Ҷалолиддини Балхӣ пайдо кардаанд, андешаи ӯро, ки ғояи такомули фитрати инсониро ифода кардааст ва башариятро дар партави ахлоқи нек ва маънавияти саршор аз ишқу муҳаббат парвардааст, мояи наҷот аз буҳронҳои маънавию иҷтимоӣ медонанд.

«Оилаи тифоқ»

Охири моҳи сентябр дар ин ҷо маҳфили доимоамалкунандаи «Оилаи тифоқ» ба ифтихори Соли оила баргузор шуд. Оилаҳои намунавии Ашӯровҳо, Қаҳҳоровҳо ва Тошматовҳо аз шебу фароз ва пастию баландии зиндагии якҷояи хеш ба ҳузурдоштагони маҳфил нақлҳои ҷолиб намуданд.

Толибилмони МТМУ-и №11 дар ситоиши меҳру муҳаббат, оилаю оиладорӣ пораҳои шеърӣ қироат карданд.

«Ҳунар беҳ аз симу зар»

Дар озмуни «Ҳунар беҳ аз симу зар» пирӯзӣ насиби Робиямоҳ Иномҷонова гардид. ӯ дар муддати 10 дақиқа гули зебоеро бо номи «Наргис» бофта манзури ҳакамону иштирокдорони чорабинӣ намуд.

Ҳунармандии ин бонуи чирадасти навгарзанӣ ҳамагонро ба ваҷд овард. Тавре худи Робиямоҳ нақл мекунад ӯ ин ҳунари аҷдодеро дар наврасиаш аз Светлана – хола ном зани рус, ки дар шаҳрак иқомат дошт омӯхтааст. Айни замон Р.Иномҷонова саъй бар он дорад, ки 5 фарзанду 9 набера ва дигар ҳамдиёронашро аз нозукиҳои касби гулдӯзӣ баҳраёб намояд.

Таҷлили Рӯзи Рӯдакӣ

Ҳеҷ шодӣ нест андар ин ҷаҳон,

Бартар аз дидори рӯи дӯстон.

Бо чунин абёти устод Абӯабдуллоҳ Рӯдакӣ маҳфили адабии «Рӯдакӣ рафту монд ҳикмати ӯй…» оғоз гардид.

Мудири бахши кор бо занон ва оилаи МИҲД-и шаҳр Муслимахон Исоқова оид ба фаъолият ва эҷодиёти устод Рӯдакӣ ҳарф зад. Панду насиҳатҳои Рӯдакӣ дурдонаи тобдори ганҷинаи ҳикмати халқи мо, ки аз имтиҳони таърих гузашта, чун ҳикмати рӯзгорон барои ҷавонони имрӯза боқӣ мондааст.